இதுவும் ஒரு மிகப்பெரிய பொய்! சீமானை கடுமையாக விமர்சித்த வன்னி அரசு!

தமிழகத்தில் நடைபெறவுள்ள சட்டமன்ற இடைத்தேர்தலில் இடதுசாரி கட்சிகள் தனித்துப் போட்டியிடுவதாக முன்கூட்டியே அறிவித்திருந்தால், நாம் தமிழர் கட்சி தேர்தலில் போட்டியிட்டிருக்காது என சீமான் கூறியிருந்தார். அவரது இந்தக் கருத்துக்கு விசிக துணைப் பொதுச்செயலாளர் வன்னி அரசு கடுமையான பதிலைத் தெரிவித்துள்ளார்.

சீமானின் கருத்து குறித்து செய்தியாளர்கள் கேள்வி எழுப்பியபோது, அவர் ஏற்கனவே பல்வேறு கருத்துகளை தெரிவித்துள்ளதாகவும், தற்போது கூறியிருப்பதும் அதுபோன்ற ஒரு கருத்துதான் என்றும் வன்னி அரசு விமர்சித்தார். குறிப்பாக, இடதுசாரிகளுக்கு ஆதரவு தெரிவிக்க வேண்டும் என்ற உண்மையான எண்ணம் சீமானுக்கு இருந்தால், அதனை செயலில் காட்ட வேண்டும் என அவர் கூறினார்.

மேலும், இடதுசாரி வேட்பாளர்களுக்கு ஆதரவு தெரிவிப்பதில் சீமான் உறுதியாக இருந்தால், தனது கட்சி சார்பில் தாக்கல் செய்யப்பட்ட வேட்புமனுக்களைத் திரும்பப் பெறச் செய்வதே நியாயமான நடவடிக்கையாக இருக்கும் என்று வன்னி அரசு தெரிவித்துள்ளார்.

இதையும் படிங்க: விஜய் சேதுபதி சர்ச்சைப் பேச்சு விவகாரம்.. சீமான் திடீர் ஆதரவு! என்ன சொன்னார் தெரியுமா?

தேர்தல் களத்தில் நாம் தமிழர் கட்சி வேட்பாளர்களை நிறுத்திவிட்டு, அதே நேரத்தில் இடதுசாரிகளுக்கு ஆதரவு தெரிவிப்பதாகக் கூறுவது முரண்பாடான நிலைப்பாடு எனவும் அவர் விமர்சித்தார். இடதுசாரிகள் மீதான அக்கறையை வெளிப்படுத்துவதாகக் கூறுவதற்கு பதிலாக, அதை செயல்பாட்டின் மூலம் நிரூபிக்க வேண்டும் என்பதே தனது நிலைப்பாடு என வன்னி அரசு தெரிவித்துள்ளார்.

மதுராந்தகம் மற்றும் தாராபுரம் ஆகிய தொகுதிகளுக்கான இடைத்தேர்தலில் இந்திய கம்யூனிஸ்ட் கட்சியும், மார்க்சிஸ்ட் கம்யூனிஸ்ட் கட்சியும் தனித்துப் போட்டியிட முடிவு செய்துள்ள நிலையில், இந்த விவகாரம் அரசியல் களத்தில் பேசுபொருளாகியுள்ளது.

இதையும் படிங்க: “கைவிடாவிட்டால் மாபெரும் போராட்டம்!”.. புதிய தலைமைச் செயலக திட்டத்துக்கு சீமான் எச்சரிக்கை!