செல்வம், பதவி எதுவும் கேட்காமல்... புரட்டாசியில் பெருமாளின் அதீத அருள் பெற தினமும் சொல்ல வேண்டிய மந்திரப் பாசுரம்..! நல்லதே நடக்கும்..!!!

புரட்டாசி மாதம் தொடங்கியதும் பெருமாள் கோவில்களில் பக்தர்கள் கூட்டம் அதிகரிக்கும். திருமாலின் அருளைப் பெற பலரும் விரதம் இருந்து வழிபடுகின்றனர். அந்த வகையில், தினமும் சொல்ல வேண்டியதாக குலசேகராழ்வார் அருளிய ஒரு சிறப்புமிக்க பாசுரம் பக்தர்களிடையே முக்கியத்துவம் பெற்றுள்ளது. பெருமாளிடம் செல்வம், பதவி எதையும் கேட்காமல், அவரது கோவில் வாசலில் ஒரு படியாக கிடக்க வேண்டும் என்ற பக்தியின் உச்சத்தை இந்த பாசுரம் வெளிப்படுத்துகிறது.

பெருமாளிடம் கேட்ட வித்தியாசமான வரம்

பொதுவாக இறைவனை வழிபடும்போது செல்வம், நல்வாழ்வு, வெற்றி உள்ளிட்டவற்றை வேண்டுவது வழக்கம். ஆனால், குலசேகராழ்வார் பெருமாளிடம் கேட்ட வரம் முற்றிலும் வேறுபட்டது. திருக்கோயிலின் வாசலில், அடியார்களும் தேவர்களும் மிதித்துச் செல்லும் ஒரு படியாக தான் இருக்க வேண்டும் என்று அவர் வேண்டினார்.

இதையும் படிங்க: இழந்த செல்வத்தை மீண்டும் பெற.. புரட்டாசி சனிக்கிழமை விரதம்.. கடைப்பிடிக்க வேண்டிய வழிபாட்டு முறைகள்!

அவரது தூய்மையான பக்தியை வெளிப்படுத்தும் இந்த வேண்டுதல் காரணமாகவே, பெருமாள் கோவில்களின் கருவறைக்கு முன்பாக இருக்கும் படி பல இடங்களில் குலசேகரப் படி என்று அழைக்கப்படுகிறது. பெருமாளின் திருமேனியை எப்போதும் பார்த்துக்கொண்டே இருப்பதுடன், அவரது பக்தர்களின் பாதங்கள் தன் மீது படும் பாக்கியமும் கிடைக்க வேண்டும் என்பதே ஆழ்வாரின் விருப்பமாக இருந்தது.

தினமும் சொல்ல வேண்டிய பாசுரம்

புரட்டாசி மாதத்தில் பெருமாளை மனதார வழிபடும் பக்தர்கள் தினமும் இந்த பாசுரத்தை சொல்லலாம்:

“செடியாய வல்வினைகள் தீர்க்கும் திருமாலே
நெடியானே! வேங்கடவா! நின் கோயிலின் வாசல்
அடியாரும் வானவரும் அரம்பையரும் கிடந்தியங்கும்
படியாய்க் கிடந்து உன் பவளவாய் காண்பேனே!”

பாசுரம் உணர்த்தும் பக்தியின் உயர்வு

முள்செடிகளைப் போல மனித வாழ்க்கையில் துன்பங்களை ஏற்படுத்தும் கொடிய வினைகளைத் தீர்க்கும் திருமாலே, திருவேங்கடவா, உன் கோவில் வாசலில் அடியார்களும் தேவர்களும் வந்து செல்கின்றனர். அவர்கள் மிதித்துச் செல்லும் படியாக நான் கிடந்தால், பக்தர்களின் பாதங்கள் என் மீது படும். அதே நேரத்தில், உன் பவளம் போன்ற திருவாயையும் அழகிய திருமேனியையும் தொடர்ந்து தரிசிக்க முடியும் என்று குலசேகராழ்வார் பெருமாளிடம் வேண்டுகிறார்.

பெருமாளை வழிபடுவதுடன் அவரது அடியார்களுக்கு சேவை செய்வதும் உயர்ந்த பக்தி என்பதை இந்த பாசுரம் உணர்த்துகிறது. செல்வம் அல்லது பதவி இல்லாவிட்டாலும், உண்மையான பக்தியுடன் இறைவனை அணுக முடியும் என்பதே இதன் முக்கியமான கருத்தாகும். புரட்டாசி மாதத்தில் தினமும் இந்த பெருமாள் பாசுரத்தை மனதார பாடி வழிபடுவது பக்தர்களுக்கு ஆன்மிக நிறைவை அளிக்கும் என்ற நம்பிக்கை தொடர்ந்து நிலவி வருகிறது.

இதையும் படிங்க: புரட்டாசி மாதத்தில் ஏன் அசைவம் சாப்பிடக்கூடாது? ஆன்மீக ரீதியாக சொல்லப்படும் முக்கிய காரணங்கள் என்ன?