அதிர்ச்சி! நிலவில் உருவான 728 அடி பிரம்மாண்ட பள்ளம்...! இரவோடு இரவாக மாறிய நிலவின் முகம்...! விஞ்ஞானிகளின் ஆய்வுகளில் வெளிச்சத்துக்கு வந்த மோதல்...!!!

பூமியிலிருந்து பார்க்கும்போது அமைதியாகத் தோன்றும் நிலவில், 2024-ம் ஆண்டு மிகப்பெரிய விண்வெளி மோதல் ஒன்று நிகழ்ந்துள்ளது. ஏப்ரல் 11 முதல் மே 22-க்குள் நிலவின் கிழக்குப் பகுதியில் சிறுகோள் அல்லது வால்நட்சத்திரத்தின் ஒரு பகுதி மோதியதாக விஞ்ஞானிகள் கண்டறிந்துள்ளனர். இதன் தாக்கத்தில் சுமார் 728 அடி (222 மீட்டர்) அகலமும், 141 அடி (43 மீட்டர்) ஆழமும் கொண்ட புதிய பள்ளம் உருவாகியுள்ளது.

சமீப காலத்தில் சூரியக் குடும்பத்தில் கண்டறியப்பட்ட பெரிய தாக்கப் பள்ளங்களில் ஒன்றாக இது கருதப்படுகிறது. ஏறத்தாழ இரண்டு கால்பந்து மைதானங்களின் பரப்பளவுக்கு இணையான இந்த பள்ளம், நிலவின் மேற்பரப்பில் ஏற்பட்ட சக்திவாய்ந்த மாற்றத்தை வெளிப்படுத்துகிறது.

புகைப்படங்களை ஒப்பிட்டபோது வெளிச்சத்துக்கு வந்த மோதல்

நாசாவின் விண்கலங்கள் தொடர்ந்து நிலவை கண்காணித்து வந்தாலும், மோதல் நிகழ்ந்த உடனேயே அதன் தாக்கம் கண்டறியப்படவில்லை. நிலவைச் சுற்றி எடுக்கப்பட்டுள்ள கோடிக்கணக்கான புகைப்படங்களில் ஏற்படும் சிறிய மாற்றங்களை அடையாளம் காண்பது மிகப்பெரிய சவாலாக உள்ளது.

இந்நிலையில், 2025 ஆகஸ்ட் மாதத்தில் பழைய மற்றும் புதிய நிலவு புகைப்படங்களை விஞ்ஞானிகள் ஒப்பிட்டுப் பார்த்தபோது, மேற்பரப்பில் ஏற்பட்டிருந்த மாற்றம் கவனத்திற்கு வந்தது. ஆய்வுகளின்படி, சுமார் 3 முதல் 6 மாடி கட்டிடத்தின் அளவிலான விண்வெளிப் பொருள் மோதியிருக்கலாம். அதன் தாக்கத்தில் நிலவின் மண் மற்றும் பாறைத் துகள்கள் 100 கிலோமீட்டருக்கும் அதிகமான தூரத்துக்கு தூக்கி வீசப்பட்டதாக தெரிவிக்கப்பட்டுள்ளது.

விஞ்ஞானியின் நினைவாக பெயரிடப்பட்ட பள்ளம்

நிலவு ஆராய்ச்சியில் முக்கிய பங்காற்றிய விஞ்ஞானி டாம் மெக்கெட்சின் நினைவாக, புதிய பள்ளத்திற்கு ‘மெக்கெட்சின் பள்ளம்’ எனப் பெயரிடப்பட்டுள்ளது. மேலும், மோதல் ஏற்பட்ட பகுதியைச் சுற்றியுள்ள பகுதியில் வெப்பநிலை குறைந்திருப்பதையும் ஆய்வாளர்கள் பதிவு செய்துள்ளனர்.

இத்தகைய பெரிய அளவிலான விண்வெளி மோதல் சுமார் 132 ஆண்டுகளுக்கு ஒருமுறை மட்டுமே நிகழக்கூடிய அரிய நிகழ்வாகக் கருதப்படுகிறது. அதனால், இந்த கண்டுபிடிப்பு நிலவின் மேற்பரப்பு எவ்வாறு தொடர்ந்து மாறிக்கொண்டிருக்கிறது என்பதை புரிந்துகொள்ள விஞ்ஞானிகளுக்கு முக்கியமான தகவல்களை வழங்குகிறது.

எதிர்கால நிலவு ஆய்வுகளுக்கு முக்கிய தகவல்

இரவு நேரங்களில் பூமிக்கு வெளிச்சம் தரும் நிலவு மாறாத ஒன்றாகத் தோன்றினாலும், விண்வெளியில் இருந்து வரும் பொருட்களின் தாக்கத்தால் அதன் மேற்பரப்பு தொடர்ந்து மாற்றமடைந்து வருகிறது. எதிர்காலத்தில் மனிதர்கள் நிலவில் தங்கி ஆய்வு மையங்களை அமைக்கும் திட்டங்கள் முன்னெடுக்கப்படும் நிலையில், இதுபோன்ற தாக்கங்களைப் புரிந்துகொள்வது பாதுகாப்பு மற்றும் ஆராய்ச்சி நடவடிக்கைகளுக்கு உதவக்கூடும்.

2024-ல் நிகழ்ந்ததாக தற்போது கண்டறியப்பட்டுள்ள இந்த நிலவு பள்ளம், விண்வெளிப் பொருட்களின் தாக்கம் எவ்வளவு பெரிய மாற்றத்தை ஏற்படுத்தும் என்பதற்கான முக்கிய சான்றாக அமைந்துள்ளது.