செஞ்சி சிறுமி வழக்கில் ஆரம்பத்தில் கதறி அழுத தாய்! ஆனால் இப்போ... திகைத்துப் போன சிபிசிஐடி! 35 நாட்களுக்குப் பின் சிக்கிய அதிர்ச்சி தகவல்...!!!
விழுப்புரம் மாவட்டம் செஞ்சி அருகே ஆலம்பூண்டி கிராமத்தில் மாயமான 7 வயது சிறுமி ஹேமலதாவைத் தேடும் பணி ஒரு மாதத்தைக் கடந்தும் தொடர்ந்து வருகிறது. பல்வேறு இடங்களில் தேடுதல் நடத்திய சிபிசிஐடி போலீசார், தற்போது சிறுமியின் குடும்பத்தினரிடமும் தீவிர விசாரணை மேற்கொண்டு வருகின்றனர். இந்த வழக்கில் கிடைத்துள்ள முரண்பாடுகள் மற்றும் தடயங்களை அடிப்படையாகக் கொண்டு விசாரணை அடுத்த கட்டத்தை எட்டியுள்ளது.
தாய், தந்தை, பாட்டியிடம் தனித்தனியாக விசாரணை
ஆலம்பூண்டி கிராமத்தைச் சேர்ந்த கூலித் தொழிலாளி வடிவேலு - பவானி தம்பதியின் மகள் ஹேமலதா. கடந்த அக்டோபர் 11-ம் தேதி இரவு பிறந்தநாளைக் கொண்டாடிய சிறுமி, தாய் மற்றும் பாட்டியுடன் உறங்கச் சென்றார். மறுநாள் அதிகாலை அவர் காணாமல் போனது தெரியவந்தது. இதையடுத்து காடுகள், கிணறுகள், வெளியூர் லாரிகள், சிசிடிவி காட்சிகள் என பல கோணங்களில் போலீசார் தேடுதல் நடத்தினர்.
இந்நிலையில், சென்னை சிபிசிஐடி டிஐஜி விக்ரமன் நேரடியாக ஆலம்பூண்டி கிராமத்திற்குச் சென்று விசாரணை நடத்தியுள்ளார். வீட்டின் கதவைப் பூட்டி வைத்து, சிறுமியின் தாய், தந்தை மற்றும் பாட்டியிடம் தனித்தனியாகக் கேள்விகள் கேட்டதாகத் தெரிகிறது. அவர்கள் அளித்த பதில்களில் சில முரண்பாடுகள் இருப்பதாக விசாரணை வட்டாரங்கள் தெரிவிக்கின்றன.
விசாரணையில் எழுந்துள்ள சந்தேகங்களும் முரண்பாடுகளும்
சிறுமி காணாமல் போனதாகக் கூறப்படும் நள்ளிரவில், பக்கத்து வீட்டினருக்கு குழந்தையின் அலறல் சத்தமும், அருகில் உள்ள வீட்டின் கதவு தட்டப்படும் சத்தமும் கேட்டதாகக் கூறப்படுகிறது. ஆனால், சிறுமிக்கு அருகில் படுத்திருந்த பெற்றோருக்கு எதுவும் கேட்கவில்லை என்பது குறித்து போலீசார் விசாரித்து வருகின்றனர். பல ஆண்டுகளாகக் கொண்டாடப்படாத பிறந்தநாள், அன்றைய தினம் மட்டும் கொண்டாடப்பட்டதும் விசாரணையில் கவனம் பெற்றுள்ளது. ஆரம்பத்தில் கதறி அழுத தாய், தற்போது தனது மகள் உயிருடன் இருப்பதாக நம்பிக்கையுடன் கூறி வருவதும் போலீசாரின் கவனத்தில் இருப்பதாகத் தகவல்கள் தெரிவிக்கின்றன.
செல்போன், வங்கிக் கணக்கு மற்றும் தடயவியல் ஆய்வு
இதற்கிடையே, பெற்றோரின் செல்போன்கள் மற்றும் வங்கிக் கணக்குப் புத்தகங்களை சிபிசிஐடி போலீசார் கைப்பற்றி ஆய்வுக்கு உட்படுத்தியுள்ளனர். குடும்பத்தினர் வேலை செய்த செங்கல் சூளையிலும் தடயவியல் நிபுணர்கள் மீண்டும் சோதனை நடத்தி, சாம்பல் மற்றும் மண் மாதிரிகளைச் சேகரித்துள்ளனர். அவை ஆய்வுக்காக அனுப்பப்பட்டுள்ளன.
சிறுமி வெளியாட்களால் கடத்தப்பட்டதற்கான உறுதியான தடயம் இதுவரை கிடைக்காத நிலையில், பல்வேறு கோணங்களில் விசாரணை தொடர்ந்து நடைபெற்று வருகிறது. செல்போன் மற்றும் தடயவியல் ஆய்வு முடிவுகள் கிடைத்த பிறகே அடுத்தகட்ட நடவடிக்கைகள் குறித்து தெளிவு கிடைக்கும். சிறுமி எங்கு இருக்கிறார் என்ற கேள்விக்கு விடை கிடைக்குமா என்ற எதிர்பார்ப்பு நீடிக்கிறது.