50 நாட்கள் ஆகிட்டு... மருத்துவமனையில் கொளத்தூர் எம்.எல்.ஏ வி.எஸ்.பாபு எப்படி உள்ளார்? உடல்நிலை குறித்து வெளியான முக்கிய தகவல்..!!!

கொளத்தூர் தொகுதி எம்.எல்.ஏ வி.எஸ்.பாபு, உடல்நலக்குறைவு காரணமாக செப்டம்பர் 9-ம் தேதி முதல் சென்னையில் உள்ள எம்.ஜி.எம் மருத்துவமனையில் சிகிச்சை பெற்று வருகிறார். அவரது உடல்நிலை குறித்து சமீப நாட்களாக பல்வேறு தகவல்கள் பரவி வந்த நிலையில், அமைச்சர் மரிய வில்சன் விளக்கம் அளித்துள்ளார். வி.எஸ்.பாபு தற்போது நலமாக இருப்பதாகவும், படிப்படியாகக் குணமடைந்து வருவதாகவும் அவர் தெரிவித்துள்ளார்.

வி.எஸ்.பாபு உடல்நிலை குறித்து அமைச்சர் விளக்கம்

2026 சட்டமன்றத் தேர்தலில் கொளத்தூர் தொகுதியில் தமிழக வெற்றிக் கழகம் சார்பில் போட்டியிட்ட வி.எஸ்.பாபு, முன்னாள் முதல்வர் மு.க.ஸ்டாலினை எதிர்த்து சுமார் 8,795 வாக்குகள் வித்தியாசத்தில் வெற்றி பெற்றார். இதற்கிடையே, கடந்த செப்டம்பர் மாதம் அவருக்கு உடல்நலக்குறைவு ஏற்பட்டதால் சென்னையில் உள்ள எம்.ஜி.எம் மருத்துவமனையில் அனுமதிக்கப்பட்டார்.

இதையும் படிங்க: கொளத்தூர் தொகுதியில் உடனே இடைத்தேர்தல் வைங்க...! MLA பாபுவுக்கு என்னாச்சு? சமூக வலைத்தளங்களில் இடைத்தேர்தல் பரபரப்பு..!!!

அவருக்கு தொடர்ந்து சிகிச்சை அளிக்கப்பட்டு வரும் நிலையில், ஆரம்பத்தில் மருத்துவமனை வெளியிட்ட அறிக்கையில் உடல்நிலை சீராக இருப்பதாகவும், சிகிச்சைக்கு உடல் ஒத்துழைப்பதாகவும் தெரிவிக்கப்பட்டிருந்தது. ஆனால், சமீப நாட்களாக புதிய மருத்துவ அறிக்கைகள் வெளியாகாததால் அவரது உடல்நிலை குறித்து பல்வேறு கேள்விகள் எழுந்தன.

இந்த நிலையில் செய்தியாளர்களிடம் பேசிய அமைச்சர் மரிய வில்சன், வி.எஸ்.பாபு படிப்படியாகக் குணமடைந்து வருவதாகக் கூறினார். அவரது உடல்நிலை குறித்து ஆதாரமற்ற வதந்திகளைப் பரப்ப வேண்டாம் என்றும், அவற்றை யாரும் நம்ப வேண்டாம் என்றும் கேட்டுக்கொண்டார். மருத்துவமனை ஏற்கனவே தகவல்களை வெளியிட்டுள்ளதாகவும், அமைச்சர்கள் நேரில் சென்று நலம் விசாரித்து வருவதாகவும் தெரிவித்தார். தானும் வி.எஸ்.பாபுவுடன் தொடர்ந்து தொடர்பில் இருப்பதாகக் கூறினார்.

மருத்துவச் செலவு குறித்து வெளியாகும் தகவல்கள்

இதற்கிடையே, வி.எஸ்.பாபுவின் சிகிச்சைக்கான செலவு குறித்தும் அரசியல் வட்டாரங்களில் பல்வேறு தகவல்கள் வெளியாகி வருகின்றன. மருத்துவமனைச் செலவு ரூ.40 லட்சத்தை நெருங்கியதாகவும், பின்னர் சிகிச்சைக்காக வெளிநாட்டிலிருந்து விலையுயர்ந்த ஊசி வரவழைக்கப்பட்டதாகவும் செய்திகள் தெரிவிக்கின்றன.

மேலும், அவருக்கு ECMO கருவியின் உதவியுடன் சிகிச்சை அளிக்கப்படுவதாகவும், மொத்த மருத்துவச் செலவு ரூ.1 கோடியைத் தாண்டியுள்ளதாகவும் தகவல்கள் வெளியாகியுள்ளன. இந்தச் செலவுகளை அமைச்சர்களில் ஒருவர் ஏற்றுக்கொண்டதாகவும் கூறப்படுகிறது. ஆனால், சிகிச்சைச் செலவு மற்றும் அதனை யார் ஏற்றுக்கொண்டது என்பது தொடர்பான தகவல்கள் அதிகாரபூர்வமாக உறுதிப்படுத்தப்படவில்லை.

50 நாட்களுக்கும் மேலாகத் தொடரும் சிகிச்சை

75 வயதான வி.எஸ்.பாபு 50 நாட்களுக்கும் மேலாக மருத்துவமனையில் சிகிச்சை பெற்று வருகிறார். அவரது உடல்நிலை குறித்து அமைச்சர் அளித்துள்ள விளக்கம் ஆதரவாளர்களுக்கு நிம்மதியை அளித்துள்ளது. அவர் விரைவில் முழுமையாகக் குணமடைந்து வீடு திரும்புவாரா என்ற எதிர்பார்ப்பும் கட்சியினர் மத்தியில் நிலவுகிறது.

இதையும் படிங்க: அரசியல் பிரவேசத்திற்கு தயாராகும் தனுஷ் நற்பணி இயக்கம் ? 3,000 சட்ட ஆலோசர்கள் நியமிப்பு... தனுஷ் எடுத்த அதிரடி முடிவு!!!