தாயுடன் சென்ற 9 வயது சிறுமி கடத்தல்! 7 ஆண்டுகள் அறைக்குள் பூட்டி வைத்த கொடூரன்... கொரோனா காலத்தில் சிறுமிக்கு கிடைத்த நல்ல வாய்ப்பு! அம்பலமான பகீர் உண்மைகள்...!!!

பள்ளியில் இருந்து வீடு திரும்பியபோது கடத்தப்பட்ட 9 வயது சிறுமி, ஏழு ஆண்டுகளுக்குப் பிறகு தாயுடன் மீண்டும் இணைந்த நெகிழ்ச்சியான சம்பவம் சீனாவில் நடந்துள்ளது. 2013-ல் கடத்தப்பட்ட ஜாங் மௌயுன், 2020-ம் ஆண்டு கொரோனா ஊரடங்கு காலத்தில் கடத்தல்காரனிடம் இருந்து தப்பித்து காவல்துறையினரிடம் தஞ்சமடைந்தார். இதையடுத்து நடந்த விசாரணையில் அவரது உண்மையான அடையாளம் உறுதி செய்யப்பட்டு, நீண்ட காலமாக மகளைத் தேடி வந்த தாயுடன் அவர் மீண்டும் சேர்க்கப்பட்டார்.

கேக் வாங்கித் தருவதாகக் கூறி கடத்தல்

2013-ம் ஆண்டு, அப்போது 9 வயதாக இருந்த ஜாங் மௌயுன் பள்ளியில் இருந்து தாயிடம் செல்லும் வழியில் வாங் தாவின் என்பவரால் கடத்தப்பட்டுள்ளார். கேக் வாங்கித் தருவதாக ஆசை காட்டி சிறுமியை அழைத்துச் சென்ற அவர், பின்னர் பல இடங்களுக்கு மாற்றி வைத்துள்ளார். சிறுமியின் அடையாளத்தை மறைத்து, தன்னை அப்பா என்று அழைக்கும்படி கட்டாயப்படுத்தியதுடன், அச்சுறுத்தல்களுக்கும் தாக்குதல்களுக்கும் உள்ளாக்கியதாகத் தகவல்கள் தெரிவிக்கின்றன.

இதையும் படிங்க: அர்ணாப் புயலின் ராட்சத அலைகள்..! சல்பர் மூட்டைகளுடன் தரைத்தட்டி தத்தளிக்கும் பிரம்மாண்ட கப்பல்..! வைரலாகும் புயலின் தாக்கம்..!!!

வெளியுலகத் தொடர்புகள் இல்லாமல் சிறிய அறையில் அடைக்கப்பட்டிருந்த சிறுமி, பலமுறை தப்பிக்க முயன்றும் முடியவில்லை. இருப்பினும், தாயை மீண்டும் பார்க்க வேண்டும் என்ற நம்பிக்கையை அவர் கைவிடவில்லை. பல ஆண்டுகள் கடுமையான சூழலில் வாழ்ந்த சிறுமிக்கு, 2020-ம் ஆண்டு தப்பிப்பதற்கான வாய்ப்பு கிடைத்தது.

ஊரடங்கு சோதனைச் சாவடியில் தஞ்சம்

2020 பிப்ரவரி 27-ம் தேதி, கொரோனா பரவலைக் கட்டுப்படுத்தும் நடவடிக்கையாக சோதனைச் சாவடி அமைக்கப்பட்டிருந்த பகுதியில் இருந்து சிறுமி தப்பித்து காவல்துறையினரிடம் உதவி கேட்டார். கடத்தப்பட்ட விவரங்களையும் தனது குடும்பப் பின்னணியையும் அவர் தெரிவித்தார். இதையடுத்து விசாரணையைத் தொடங்கிய அதிகாரிகள், வாங் தாவினைக் கைது செய்துள்ளனர்.

இதற்கிடையில், மகளைப் பிரிந்த தாய் ஜூ மௌஷி, ஏழு ஆண்டுகளாக அவரைத் தேடி வந்தார். நாடு முழுவதும் மகளின் புகைப்படங்களுடன் 2,600-க்கும் மேற்பட்ட சுவரொட்டிகளை ஒட்டி, பல இடங்களில் தேடுதல் நடத்தியதாகத் தகவல்கள் தெரிவிக்கின்றன. மகள் உயிருடன் இருக்கிறாரா என்ற பதற்றத்துக்கு மத்தியிலும், அவரைக் கண்டுபிடிக்கும் முயற்சியைத் தாய் கைவிடவில்லை.

டி.என்.ஏ பரிசோதனை மூலம் உறுதி

காவல்துறையினர் மேற்கொண்ட டி.என்.ஏ பரிசோதனையில், ஜாங் மௌயுன் அவரது தாயின் மகள் என்பது உறுதி செய்யப்பட்டது. இதையடுத்து, ஏழு ஆண்டுகளுக்குப் பிறகு இருவரும் மீண்டும் சந்தித்தனர். நீண்ட காலப் பிரிவுக்குப் பிறகு தாயும் மகளும் ஒன்றிணைந்தது பலரையும் நெகிழச் செய்தது.

2020 மார்ச் 10-ம் தேதி, சிறுமியைக் கடத்தியது மற்றும் போலி ஆவணங்களைத் தயாரித்தது உள்ளிட்ட குற்றச்சாட்டுகளின் பேரில் வாங் தாவின் மீது அதிகாரப்பூர்வமாக கைது நடவடிக்கை எடுக்கப்பட்டதாகத் தெரிவிக்கப்பட்டுள்ளது. பல ஆண்டுகளாக நீடித்த சிறுமியின் துயர வாழ்க்கைக்கு முற்றுப்புள்ளி வைத்த இந்தச் சம்பவம், விடாமுயற்சியுடன் மகளைத் தேடிய தாயின் போராட்டத்தையும் வெளிப்படுத்துகிறது.

இதையும் படிங்க: துணியால் சுற்றப்பட்டு பிறந்த சில நிமிடங்களில் வீசப்பட்ட பிஞ்சு சிசு! உடலில் வீசிய அந்த ஒரு வாசனை... பகீர் சம்பவம்!!!