மாந்திரீகமா..? செஞ்சி சிறுமி வழக்கில் அடுத்தடுத்து வெளிவரும் அதிர்ச்சி...! விஷம் குடிக்க போன ஊராட்சி மன்ற தலைவர்... மாயமான 2 பேர்.! திடுக்கிடும் பின்னணி...!!!

விழுப்புரம் மாவட்டம் செஞ்சி அருகே ஆலம்பூண்டியில் 7 வயது சிறுமி ஹேமலதா மாயமான வழக்கில் சிபிசிஐடி போலீசார் தீவிர விசாரணை நடத்தி வருகின்றனர். கடந்த அக்டோபர் 11-ம் தேதி பிறந்தநாள் கொண்டாடிய சிறுமி, மறுநாள் அதிகாலையில் வீட்டிலிருந்து மாயமானார். 18 நாட்களுக்கும் மேலாகியும் அவரைப் பற்றிய எந்தத் தகவலும் கிடைக்காததால், பல்வேறு கோணங்களில் விசாரணை விரிவுபடுத்தப்பட்டுள்ளது.

குடும்பத்தினர், சந்தேக நபர்களிடம் விசாரணை

உள்ளூர் போலீசாரின் ஆரம்பக்கட்ட தேடுதலில் முக்கியத் தடயம் கிடைக்காததைத் தொடர்ந்து, வழக்கு சிபிசிஐடி வசம் ஒப்படைக்கப்பட்டது. சிறுமியின் தாயார் பவானி அளித்த பதில்கள், குடும்பப் பின்னணி உள்ளிட்ட விவரங்கள் அதிகாரிகளின் விசாரணைக்கு உட்படுத்தப்பட்டுள்ளன. சம்பவத்தன்று வீட்டின் அருகே மது அருந்தியதாகக் கூறப்படும் சரித்திரப் பதிவேட்டு குற்றவாளி ராஜதுரை மற்றும் அவருடன் தொடர்புடையவர்கள் குறித்தும் விசாரிக்கப்பட்டு வருகிறது. அவர்களிடம் போலி சிம் கார்டுகள் இருந்ததாகக் கூறப்படும் தகவலும் ஆய்வு செய்யப்படுகிறது.

இதையும் படிங்க: 18 நாட்கள் கடந்து.. 200 மீட்டர் தொலைவில் சிக்கிய முக்கிய ஆதாரம்! 5 பேரை மடக்கி பிடித்த சிபிசிஐடி... செஞ்சி சிறுமி வழக்கில் திடுக்கிடும் திருப்பம்..!!!

முன்னாள் ஊராட்சி தலைவர், சாமியார் குறித்தும் விசாரணை

வழக்கின் விசாரணையில் பல்வேறு நபர்களிடம் போலீசார் தகவல்களைச் சேகரித்து வருகின்றனர். சிறுமியின் குடும்பத்துக்கு உதவி வந்த முன்னாள் ஊராட்சி மன்றத் தலைவர் விஷம் குடித்து தற்கொலைக்கு முயன்றதாகக் கூறப்படும் தகவலும் விசாரணையில் கவனம் பெற்றுள்ளது. மேலும், மாயமான சாமியார், உள்ளூர் பூசாரிகள் மற்றும் பெங்களூருவில் வசிக்கும் உறவினர்கள் குறித்தும் தனிப்படையினர் விசாரித்து வருகின்றனர். மாந்திரீகம் தொடர்பான சந்தேகங்களும் விசாரணையின் ஒரு பகுதியாக இருப்பதாகத் தகவல்கள் வெளியாகியுள்ளன.

சிறுமியைத் தேடும் பணி தீவிரம்

இதுவரை சிறுமியின் செருப்பு அல்லது ஆடைகள் உள்ளிட்ட எந்தப் பொருளும் கண்டெடுக்கப்படவில்லை. இதனால், சிறுமி உயிருடன் எங்காவது இருக்கக்கூடும் என்ற கோணத்திலும் போலீசார் தேடுதல் பணியைத் தொடர்ந்து வருகின்றனர். குடும்பத்தினரிடம் உள்ள முரண்பாடுகள் மற்றும் சந்தேகத்திற்குரிய தகவல்களை ஒப்பிட்டுப் பார்த்து விசாரணை நடைபெறுகிறது.

18 நாட்களைக் கடந்தும் ஹேமலதா குறித்த தகவல் கிடைக்காதது அவரது குடும்பத்தினரையும், அப்பகுதி மக்களையும் கவலையில் ஆழ்த்தியுள்ளது. சிறுமி எங்கிருக்கிறார், அவர் மாயமானதற்குப் பின்னால் என்ன நடந்தது என்பதைக் கண்டறிய சிபிசிஐடி போலீசார் தொடர்ந்து விசாரணை நடத்தி வருகின்றனர். விசாரணையின் முடிவில் மட்டுமே இந்த வழக்கின் உண்மை நிலை தெரியவரும்.

இதையும் படிங்க: 18 நாட்கள் ஆகிட்டு...! செஞ்சி சிறுமி வழக்கில் உள்ளூர் போலீசார் தவற விட்ட அந்த ஒரு விஷயம்...! வெளிவந்த அதிர்ச்சி தகவலால் ஆரம்பக்கட்ட விசாரணையில் அதிரடி காட்டும் சிபிசிஐடி..!!!