அதுல இருந்து காவடி தூக்கும் சீமானே.... உதயநிதி இத செஞ்சா மறுநாளே நான் எம்பி பதவியை ராஜினாமா செய்கிறேன்! சவால் விட்ட எம்பி மாணிக்கம் தாகூர்..!!!

சென்னையில் நாம் தமிழர் கட்சியின் தலைமை ஒருங்கிணைப்பாளர் சீமான் முன்வைத்த விமர்சனங்களுக்கு காங்கிரஸ் நாடாளுமன்ற உறுப்பினர் மாணிக்கம் தாகூர் கடுமையான பதிலடி கொடுத்துள்ளார். தேர்தல் தோல்விக்குப் பிறகு அரசியல் எதிர்காலம் குறித்த அச்சத்தில்தான் சீமான் தொடர்ந்து பேசிவருவதாக அவர் குற்றம்சாட்டினார்.

செய்தியாளர்களை சந்தித்த மாணிக்கம் தாகூர், சமீபத்திய தேர்தல்களுக்குப் பிறகு நாம் தமிழர் கட்சியின் வாக்கு சதவீதம் கணிசமாக குறைந்துள்ளதாக கூறினார். காரைக்குடி தொகுதியில் போட்டியிட்ட சீமான் டெபாசிட்டையே இழந்துவிட்டதாகவும் அவர் சாடினார்.

இதையும் படிங்க: பெண்களுக்கு பாதுகாப்பு கொடுக்கும் CM விஜய் முதலில் மனைவிக்கு பதில் சொல்லட்டும்! இன்னும் 4- 6 மாதங்களில் முதல்வர் ஸ்டாலின் தான்..... அனிதா ராதாகிருஷ்ணன் பரபரப்பு பேச்சு.!!!

தோல்வி பயத்தால் பேசுகிறார்

தேர்தல் முடிவுகளால் ஏற்பட்ட ஏமாற்றமும், எதிர்கால அரசியல் நிலை குறித்த கவலையும் சீமானின் தற்போதைய பேச்சுகளில் வெளிப்படுவதாக மாணிக்கம் தாகூர் விமர்சித்தார். திமுக முன்னாள் அமைச்சர் அனிதா ராதாகிருஷ்ணன் சீமானின் வீட்டிற்கு சீர்வரிசையுடன் சென்ற நிகழ்வுக்குப் பிறகே அவரது அரசியல் நிலைப்பாட்டில் மாற்றம் ஏற்பட்டதாகவும் அவர் குறிப்பிட்டார்.

அதன்பின், உதயநிதி ஸ்டாலினுக்கு ஆதரவாக செயல்படத் தொடங்கியுள்ளதாகவும், திமுக குறித்து விமர்சித்துவந்த நிலைப்பாட்டிலிருந்து சீமான் விலகியுள்ளதாகவும் அவர் தெரிவித்தார்.

ராஜினாமா விவகாரத்தில் சவால்

திமுக வாக்குகளால் மட்டுமே காங்கிரஸ் வெற்றி பெற்றது என்ற சீமானின் கருத்தை நிராகரித்த மாணிக்கம் தாகூர், அதற்கு நேரடியாக சவால் விடுத்தார். “காங்கிரஸ் வாக்குகளால் வெற்றி பெற்ற உதயநிதி ஸ்டாலின் முதலில் தனது பதவியை ராஜினாமா செய்யட்டும். அவர் செய்த மறுநாளே நான் என் எம்பி பதவியை ராஜினாமா செய்கிறேன்” என்று கூறினார்.

இந்த கருத்து அரசியல் வட்டாரங்களில் புதிய விவாதத்தை ஏற்படுத்தியுள்ளது.

காங்கிரஸ் குறித்து கடும் பதில்

தொடர்ந்து பேசிய மாணிக்கம் தாகூர், 140 ஆண்டுகளுக்கும் மேலான வரலாற்றைக் கொண்ட காங்கிரஸ் கட்சி இதுபோன்ற அரசியல் தாக்குதல்களை பலமுறை சந்தித்துள்ளதாக கூறினார். காங்கிரசுக்கு சுயநலமும், சுயகௌரவமும் இருப்பதாக தெரிவித்த அவர், நாம் தமிழர் கட்சிதான் மக்களிடமிருந்து படிப்படியாக விலகிச் சென்று வருவதாக விமர்சித்தார்.

மேலும், வீராவேசமான அரசியல் பேச்சுகளால் எந்த மாற்றமும் ஏற்படாது என்றும், கட்சியின் எதிர்காலத்தை பாதுகாப்பதில் கவனம் செலுத்த வேண்டும் என்றும் சீமானுக்கு அறிவுரை கூறினார். அவரது இந்த கருத்துகள் தற்போது அரசியல் களத்தில் பரபரப்பை ஏற்படுத்தியுள்ளன.

இதையும் படிங்க: சவாலுக்கு பதிலடி சவால் தான்.... இது மட்டும் நடந்தால் எனது ஒரு பக்க மீசையை எடுத்துக் கொள்ள ரெடி...! விஜய்க்கு பகிரங்க சவால் விட்ட ஆர்.எஸ் பாரதி..!!!