திடீர் திருத்தம்! எடப்பாடி அறிவித்த 10,000 வாக்குறுதியில் அதிரடி மாற்றம்! அதிமுக வின் அரசியல் சுதாரிப்பு !!!

தமிழக அரசியலில் தேர்தல் சூடு அதிகரித்துள்ள நிலையில், அதிமுக வெளியிட்ட ஒரு அறிவிப்பு சமூக வலைதளங்களில் கடும் விவாதத்துக்கு வழிவகுத்துள்ளது. குறிப்பாக, மாதம் ₹10,000 வழங்கும் திட்டத்தின் பெயர் மாற்றம் அரசியல் வட்டாரங்களில் புதிய பரபரப்பை ஏற்படுத்தியுள்ளது.

மூன்றாம் கட்ட தேர்தல் வாக்குறுதி வெளியீடு

சென்னையில் இன்று (பிப். 24) செய்தியாளர்களைச் சந்தித்த அதிமுக பொதுச்செயலாளர் எடப்பாடி பழனிசாமி, கட்சியின் மூன்றாம் கட்ட தேர்தல் வாக்குறுதிகளை வெளியிட்டார். அதில், அதிமுக ஆட்சிக்கு வந்தால் ஒவ்வொரு குடும்பத்திற்கும் மாதம் ₹10,000 வழங்கப்படும் என்று அறிவித்தார்.

இந்தத் திட்டம் ஆரம்பத்தில் கருணைத் தொகை என்ற பெயரில் அறிவிக்கப்பட்டது. ஆனால், இந்த பெயரே சமூக வலைதளங்களில் எதிர்ப்பை கிளப்பியது.

இதையும் படிங்க: சற்று முன்... தவெக கூட்டணியில் இணையும் தேசிய கட்சி! ஒரே போடாய் போட்ட நாஞ்சில் சம்பத்! பரபரப்பில் அரசியல் களம்!!!

‘கருணை’ என்ற சொல்லுக்கு எதிர்ப்பு

மக்களுக்கான நலத்திட்டத்தை ‘கருணைத் தொகை’ என அழைப்பது, அது ஒரு இரக்கத் தொகை போல தோன்றுகிறது என்றும், மக்கள் உரிமையாகப் பெற வேண்டிய நிதியை இவ்வாறு குறிப்பிடுவது பொருத்தமல்ல என்றும் நெட்டிசன்கள் மற்றும் அரசியல் விமர்சகர்கள் கருத்து தெரிவித்தனர்.

இதனால் அரசியல் வட்டாரங்களிலும் விவாதம் தீவிரமடைந்தது. எதிர்க்கட்சிகளும் இந்த வார்த்தைப் பயன்பாட்டை விமர்சித்ததாக தகவல்கள் வெளியாகின.

அதிமுக சுதாரிப்பு – ‘உரிமைத் தொகை’ என பெயர் மாற்றம்

விமர்சனங்கள் அதிகரித்ததைத் தொடர்ந்து, அதிமுக தலைமையகம் உடனடியாக நடவடிக்கை எடுத்தது. அதிகாரப்பூர்வமாக, இனி இந்த திட்டம் உரிமைத் தொகை என்ற பெயரில் வழங்கப்படும் என்று அறிவிக்கப்பட்டது.

இந்த பெயர் மாற்றம் மூலம், இது மக்களின் அடிப்படை உரிமையாக வழங்கப்படும் நிதி உதவி என்பதைக் கட்சி வலியுறுத்தியுள்ளது. தேர்தல் காலத்தில் ஒரு சொல் கூட எவ்வளவு முக்கியத்துவம் பெறுகிறது என்பதற்கு இந்த சம்பவம் ஒரு எடுத்துக்காட்டாக பார்க்கப்படுகிறது.

மொத்தத்தில், ₹10,000 மாதாந்திர திட்டம் அரசியல் அரங்கில் முக்கிய விவாதமாக மாறியுள்ள நிலையில், பெயர் மாற்றம் அதிமுகவின் தேர்தல் அணுகுமுறையில் புதிய திருப்பமாக கருதப்படுகிறது.

இதையும் படிங்க: அடி தூள்.... அனைத்து குடும்பத்திற்கும் ரூ.10,000! ஜெயலலிதாவின் 78 வது பிறந்தநாளில் இபிஎஸ் கொடுத்த இன்பச் செய்தி!!!