ஆண் உடலில் பெண் இனப்பெருக்க உறுப்புகள்.. டெல்லி மருத்துவர்களை அதிரவைத்த அரிய மருத்துவ சம்பவம்!

டெல்லியில் 26 வயது இளைஞர் ஒருவரின் உடலில் பெண்களுக்கான கருப்பை மற்றும் கருக்குழாய்கள் இருப்பது கண்டறியப்பட்டுள்ளது. குழந்தைப் பேறுக்காக மருத்துவப் பரிசோதனைக்கு சென்றபோது இந்த அரிய மருத்துவ நிலை தெரியவந்துள்ளது. அடிவயிற்றில் மேற்கொள்ளப்பட்ட எம்.ஆர்.ஐ மற்றும் லேப்ராஸ்கோபி பரிசோதனைகளில், அவரது உடலுக்குள் கருப்பை மற்றும் கருக்குழாய்கள் இருப்பது கண்டறியப்பட்டது.

வெளிப்புறத் தோற்றத்தில் அந்த இளைஞர் ஆணாகவே இருந்துள்ளார். மரபணுப் பரிசோதனையிலும் அவருக்கு ஆண்களுக்குரிய 46,XY குரோமோசோம் அமைப்பு இருப்பது உறுதி செய்யப்பட்டது. ஆனால், விந்தணுப் பரிசோதனையில் விந்தணுக்கள் இல்லாததும், ஆண்களுக்குரிய இரண்டு விரைகளும் வழக்கமான இடத்தில் இல்லாமல் வயிற்றுப் பகுதியில் இருந்ததும் தெரியவந்தது.

மருத்துவர்கள் இந்த அரிய நிலையை தொடர்ச்சியான முல்லேரியன் குழாய் நோய்க்குறி (Persistent Müllerian Duct Syndrome – PMDS) எனக் குறிப்பிடுகின்றனர். பொதுவாக ஆண் கரு வளரும்போது ஆன்டி-முல்லேரியன் ஹார்மோன் செயல்பாட்டின் மூலம் பெண்களுக்கான இனப்பெருக்க உறுப்புகள் உருவாகாமல் தடுக்கப்படும். ஆனால், இந்த ஹார்மோன் சரியாக செயல்படாத நிலையில், கருப்பை மற்றும் கருக்குழாய்கள் போன்ற உறுப்புகள் ஆண் உடலிலேயே நீடிக்கக்கூடும்.

இதையும் படிங்க: 3 குழந்தைகளின் தாய்... 13 வயது இளைய இளைஞருடன் காதல்! வீட்டில் சிக்கியதால் நடந்த அதிர்ச்சி சம்பவம்!

இந்த பாதிப்பு வெளிப்புறமாக பெரும்பாலும் எந்த அறிகுறிகளையும் ஏற்படுத்தாது என்பதால், பலருக்கு வாழ்நாள் முழுவதும் இது தெரியாமல் போகும் வாய்ப்புள்ளது. குடலிறக்க அறுவை சிகிச்சை அல்லது குழந்தைப் பேறுக்கான மருத்துவப் பரிசோதனைகளின்போது இது தற்செயலாக கண்டறியப்படுவது வழக்கம்.

இந்தியாவில் இதுபோன்ற 20-க்கும் மேற்பட்ட வழக்குகள் மருத்துவ இதழ்களில் பதிவாகியுள்ளதாகவும், உலகளவில் 300-க்கும் குறைவான வழக்குகளே பதிவாகியுள்ளதாகவும் கூறப்படுகிறது. டெல்லியில் தற்போது கண்டறியப்பட்டுள்ள இந்த சம்பவமும் மிகவும் அரிதான மருத்துவ நிகழ்வாகக் கருதப்படுகிறது.

இதையும் படிங்க: நாத்தனாரை பார்க்க போவதாக வீட்டை விட்டு வெளியேறிய மனைவி! ஆனால் இறுதியில் கணவன் கண்ட அதிர்ச்சி... ! பகீர் சம்பவம்!!!