திமுக- வின் தீர்மானமான முடிவு இதுதான்... முதல் கட்டத்திலேயே விஜய்க்கு ஆப்பு.! தமிழக அரசியலில் பரபரப்பு..!!!

மக்களவைத் தொகுதி மறுவரையறை விவகாரம் தமிழக அரசியலில் மீண்டும் பரபரப்பை ஏற்படுத்தியுள்ளது. தென் மாநிலங்களின் நாடாளுமன்ற பிரதிநிதித்துவம் குறையக்கூடும் என்ற அச்சம் நீடிக்கும் நிலையில், முதலமைச்சர் விஜய் தலைமையில் சென்னையில் அனைத்துக் கட்சி எம்.பி.க்கள் ஆலோசனைக் கூட்டம் நடைபெற்றது. ஆனால், முக்கிய எதிர்க்கட்சிகள் பங்கேற்காததால் கூட்டத்தின் நோக்கம் அரசியல் ரீதியாக கேள்விக்குறியாகியுள்ளது.

முக்கிய கட்சிகள் புறக்கணிப்பு

தொகுதி மறுவரையறை மசோதா ஏற்படுத்தக்கூடிய தாக்கங்கள் குறித்து விவாதிக்கவே இந்தக் கூட்டம் கூட்டப்பட்டதாக தெரிவிக்கப்பட்டது. குறிப்பாக மக்கள் தொகையை கட்டுப்படுத்திய தமிழ்நாடு உள்ளிட்ட தென் மாநிலங்களுக்கு நாடாளுமன்றத்தில் கிடைக்கும் பிரதிநிதித்துவம் குறையக்கூடும் என்ற கவலை முக்கியமாக முன்வைக்கப்படுகிறது.

இதையும் படிங்க: 850 தொகுதிகள் என்றால் ஒரு MP-க்கு 96 நிமிடங்கள் தானா? இதில் 10 கோடி செலவு! மனோ தங்கராஜின் பகீர் கணக்கால் அதிர்ச்சியில் அரசியல் களம்!!!

ஆனால், கூட்டத்தில் திமுக, அதிமுக, பாமக, தேமுதிக, மநீம உள்ளிட்ட முக்கிய கட்சிகள் பங்கேற்கவில்லை. இதனால் அனைத்துக் கட்சி ஆலோசனைக் கூட்டமாக நடத்த திட்டமிடப்பட்டிருந்த நிகழ்வு, தவெக கூட்டணி எம்.பி.க்களின் ஆலோசனையாகவே முடிந்தது. இதன் மூலம் திமுகவை அரசியல் ரீதியாக நெருக்கடிக்கு உள்ளாக்கும் முயற்சி எதிர்பார்த்த அளவுக்கு பலன் தரவில்லை என அரசியல் பார்வையாளர்கள் கருதுகின்றனர்.

மேகதாது விவகாரத்தை முன்வைத்த திமுக

இதனிடையே, தவெக அரசின் முயற்சிக்கு திமுக தனது நிபந்தனையை முன்வைத்துள்ளது. தமிழகத்தின் முக்கிய பிரச்சினைகளில் ஒன்றான மேகதாது விவகாரம் குறித்து முதலில் அனைத்துக் கட்சி கூட்டத்தை அரசு நடத்த வேண்டும் என்றும், அவ்வாறு கூட்டப்பட்டால் தொகுதி மறுவரையறை தொடர்பான எம்.பி.க்கள் ஆலோசனையில் திமுக பங்கேற்கும் என்றும் தெரிவிக்கப்பட்டுள்ளது.

தொகுதி மறுவரையறைக்கு திமுக எதிரானது அல்ல என்றும், அது அனைத்து மாநிலங்களுக்கும் நியாயமான முறையில் அமைய வேண்டும் என்பதே தங்கள் நிலைப்பாடு என்றும் அக்கட்சி விளக்கம் அளித்துள்ளது. குறிப்பாக, நாடாளுமன்ற தொகுதிகளின் எண்ணிக்கையை அதிகரிக்கும் போது அனைத்து மாநிலங்களுக்கும் உரிய பிரதிநிதித்துவம் கிடைக்கும் வகையில் 50 சதவீத இடங்களை உயர்த்த வேண்டும் என்ற கோரிக்கையையும் திமுக முன்வைத்துள்ளது.

நாடாளுமன்ற கணக்கில் திமுகவின் நிலைப்பாடு

மத்திய அரசு கொண்டு வரத் திட்டமிட்டுள்ள அரசியலமைப்புத் திருத்த மசோதாவுக்கு நாடாளுமன்றத்தில் மூன்றில் இரண்டு பங்கு உறுப்பினர்களின் ஆதரவு தேவைப்படும் நிலையில், அதிக எண்ணிக்கையிலான எம்.பி.க்களை கொண்ட திமுகவின் நிலைப்பாடு முக்கியத்துவம் பெறுகிறது. மசோதாவின் அதிகாரப்பூர்வ நகல் கிடைத்த பிறகே இறுதி முடிவு எடுக்கப்படும் என திமுக தெரிவித்துள்ளது.

இதனால், தொகுதி மறுவரையறை விவகாரம் நாடாளுமன்ற கணக்கைத் தாண்டி தமிழக அரசியலிலும் முக்கியமான நகர்வாக மாறியுள்ளது. தவெக நடத்திய ஆலோசனைக் கூட்டத்தை திமுக தனது நிபந்தனையின் மூலம் எதிர்கொண்டுள்ள நிலையில், அடுத்த கட்டத்தில் இரு தரப்பும் எவ்வாறு நகர்கின்றன என்பது அரசியல் வட்டாரங்களில் கவனத்தை ஈர்த்துள்ளது.

இதையும் படிங்க: அதிர்ச்சி! முதல்வர் விஜய்கு எதிராக ஸ்டாலின்- எடப்பாடி போட்ட சீக்ரெட் பிளான்? தமிழக அரசியலில் பரபரப்பு...!!!