சீதையைக் காப்பாற்ற ராவணனிடமே போரிட்ட ஜடாயு சிலை! கேரளாவில் 200 அடி நீளத்தில் இருக்கும் பிரம்மாண்ட சிலை... 826 படிகள்.! வைரலாகும் அதிசய வீடியோ..!!!

ராமாயணத்தில் சீதையைக் காப்பாற்றுவதற்காக ராவணனை எதிர்த்துப் போராடிய ஜடாயுவின் வீரத்தை நினைவுகூரும் வகையில், கேரளத்தில் பிரம்மாண்டமான பறவைச் சிலை அமைக்கப்பட்டுள்ளது. கொல்லம் மாவட்டம் சடயமங்கலத்தில் உள்ள மலைப்பகுதியில் அமைந்திருக்கும் இந்த ஜடாயு பூமி மையம், சுற்றுலாப் பயணிகளைக் கவரும் முக்கிய இடமாக மாறியுள்ளது. புராணக் கதையையும் இயற்கை அழகையும் ஒரே இடத்தில் அனுபவிக்க விரும்புவோருக்கு இது சிறந்த சுற்றுலாத் தலமாக உள்ளது.

சீதைக்காக ராவணனை எதிர்த்துப் போரிட்ட ஜடாயு

ராமாயணத்தின்படி, அயோத்தி மன்னர் தசரதனின் நெருங்கிய நண்பராக இருந்தவர் ஜடாயு. ராவணன் சீதையைக் கடத்திச் சென்றபோது, அவரது அழுகுரலைக் கேட்டு ஜடாயு வழிமறித்துப் போரிட்டார். வயதான நிலையிலும் துணிச்சலுடன் எதிர்த்த அவர், ராவணனின் தேரையும் சேதப்படுத்தினார்.

இதையும் படிங்க: 2 மாத பிச்சு குழந்தைக்கு எமனான சொந்த அத்தை, பாட்டி..! தீபாவளி அம்மாவாசை இரவில் நரபலி.... போலீஸ் நடத்திய அதிரடி வேட்டை..! இறுதியில் நடந்த பெரிய ட்விஸ்ட்..!!!

ஆனால், போரின் முடிவில் ராவணன் ஜடாயுவின் இறக்கைகளை வெட்டியதால் அவர் கீழே விழுந்தார். படுகாயமடைந்த நிலையிலும் உயிருடன் இருந்த ஜடாயு, பின்னர் அங்கு வந்த ராமர், லட்சுமணனிடம் சீதையை ராவணன் எந்தத் திசையில் அழைத்துச் சென்றார் என்பதைத் தெரிவித்துவிட்டு உயிரிழந்ததாகக் கதை கூறுகிறது.

200 அடி நீளத்தில் பிரம்மாண்ட ஜடாயு சிலை

ஜடாயுவின் தியாகத்தை நினைவூட்டும் வகையில், சடயமங்கலத்தில் சுமார் 200 அடி நீளம், 150 அடி அகலம், 70 அடி உயரத்தில் இந்தச் சிலை உருவாக்கப்பட்டுள்ளது. புகழ்பெற்ற சிற்பியும் திரைப்படக் கலை இயக்குநருமான ராஜீவ் ஆஞ்சல் இதனை வடிவமைத்துள்ளார். காயமடைந்து கிடக்கும் நிலையில் ஜடாயுவின் உருவம் அமைக்கப்பட்டுள்ளது.

சுமார் 65 ஏக்கர் பரப்பளவில் நான்கு மலைகளை உள்ளடக்கிய இந்தச் சுற்றுலா மையம், இயற்கைச் சூழல், சாகச விளையாட்டுகள் மற்றும் புராண வரலாறு ஆகியவற்றை ஒருங்கிணைக்கிறது. இதனால் குடும்பத்துடன் சுற்றுலா செல்பவர்கள் மட்டுமின்றி, சாகச அனுபவத்தை விரும்புவோரும் இங்கு அதிகம் வருகின்றனர்.

கேபிள் கார், 826 படிக்கட்டுகள் என சுற்றுலா அனுபவம்

மலை உச்சியில் உள்ள ஜடாயு சிலையைப் பார்ப்பதற்கு கேபிள் கார் வசதி உள்ளது. விரும்புபவர்கள் 826 படிக்கட்டுகள் வழியாகவும் மேலே செல்லலாம். மேலும், ஜடாயுவின் கதையை விளக்கும் அருங்காட்சியகம் மற்றும் 6டி திரையரங்க அனுபவமும் சுற்றுலாப் பயணிகளுக்காக அமைக்கப்பட்டுள்ளன.

திருவனந்தபுரத்திலிருந்து சுமார் 50 கி.மீ. தொலைவில் இந்த மையம் அமைந்துள்ளது. கேரளாவுக்குச் சுற்றுலா செல்லத் திட்டமிடுபவர்கள், கொல்லம் மாவட்டத்தில் உள்ள இந்த ஜடாயு பூமி மையத்தையும் தங்களது பயணத் திட்டத்தில் சேர்த்துக்கொள்ளலாம்.

இதையும் படிங்க: காணாமல் போன 6 வயது சிறுமி வனப்பகுதியில் சடலமாக மீட்பு..! அண்டை வீட்டு சிறுவன் செய்த அதிர்ச்சி.. சிசிடிவியால் வெளிவந்த பகீர் உண்மை..!!!