வீட்டில் இருந்தாலும் ஏன் எப்போதும் சோர்வாக இருக்கிறோம்? காரணம் இதுதானா?

காலை எழுந்ததும் சோர்வு, மதியம் தூக்கக் கலக்கம், மாலை ஆனதும் உடலில் சக்தியே இல்லாதது போன்ற உணர்வுகள் பலருக்கும் ஏற்படுகின்றன. "நாள் முழுவதும் வீட்டில்தானே இருந்தேன், இவ்வளவு சோர்வு ஏன்?" என்ற கேள்வியும் மனதில் தோன்றலாம். 

ஆனால் இந்த சோர்வுக்குப் பின்னால் உடல் உழைப்பு மட்டுமல்ல, பல மறைமுக காரணங்களும் இருக்கின்றன என மருத்துவர்கள் கூறுகின்றனர்.

சூரிய ஒளி குறைவாக கிடைப்பதும் ஒரு முக்கிய காரணமாக இருக்கலாம். வீட்டிற்குள் அதிக நேரம் செலவிடுபவர்கள் இயற்கை வெளிச்சத்துடன் குறைவாக தொடர்பில் இருப்பதால், உடலின் உயிரியல் கடிகாரம் (Body Clock) பாதிக்கப்படலாம். இதனால் புத்துணர்ச்சி குறைந்து, நாள் முழுவதும் மந்தநிலை மற்றும் சோர்வு ஏற்படலாம்.

இதையும் படிங்க: அடிக்கடி தலைவலி வருகிறதா? உஷார்.! இப்போவே கவனிக்கலன்னா.. வருத்தப்படுவீங்க.!

மேலும், நீண்ட நேரம் ஒரே இடத்தில் அமர்ந்திருப்பதும் உடலின் சக்தியை குறைக்கிறது. உடற்பயிற்சி செய்யாமல் இருப்பது ஓய்வு என்று பலர் நினைத்தாலும், உண்மையில் உடல் இயக்கம் குறைந்தால் ரத்த ஓட்டம் மந்தமாகி, தசைகள் சுறுசுறுப்பை இழக்கத் தொடங்கும். இதுவும் அடிக்கடி சோர்வாக உணர வைக்கும் காரணங்களில் ஒன்றாகும்.

மேலும், சோர்வுக்கு உணவுப் பழக்கங்களும் காரணமாக இருக்கலாம். காலை உணவைத் தவிர்ப்பது, அதிகமாக ஜங்க் உணவுகளைச் சாப்பிடுவது, போதுமான தண்ணீர் குடிக்காதது போன்றவை உடலின் சக்தி உற்பத்தியை பாதிக்கின்றன. குறிப்பாக இரும்புச்சத்து, வைட்டமின் B12 மற்றும் வைட்டமின் D குறைபாடு இருந்தால், எந்த வேலை செய்யாமல் இருந்தாலும் சோர்வு நீடிக்கலாம்.

சோர்வு என்பது எப்போதும் அதிக வேலை செய்ததற்கான அறிகுறி மட்டுமல்ல. சில நேரங்களில் உடலில் நமக்கு ஓய்வு, சத்தான உணவு அல்லது வாழ்க்கை முறையில் மாற்றம் தேவை என்பதை தெரிவிக்கும் ஒரு எச்சரிக்கை அறிகுறியாகவும்   இருக்கலாம்.

எனவே தொடர்ந்து சோர்வாக இருப்பதை அலட்சியப்படுத்தாமல், அதன் காரணத்தை கண்டறிந்து சரிசெய்வது அவசியம். சரியான பழக்கவழக்கங்களையும் ஆரோக்கியமான வாழ்க்கை முறையையும் பின்பற்றினால், தினசரி வாழ்க்கையில் மீண்டும் புத்துணர்ச்சியையும் சுறுசுறுப்பையும் பெற முடியும்.

இதையும் படிங்க: இளைஞர்களின் புதிய ட்ரெண்ட்.. ஏன் ஜிம் கலாச்சாரம் வேகமாக வளர்கிறது?