6 நிமிடம் 23 வினாடி நடக்கும் அரிய நிகழ்வு! 1991-க்கு பின் நடக்கும் அந்த விண்வெளி அதிசயம்.... கிரகணத்தின் சிறப்பு என்ன தெரியுமா? நாசா வெளியிட்ட அந்த அதிசய தேதி இதுதான்....!!!

உலகம் முழுவதும் விண்வெளி ஆர்வலர்கள் ஆவலுடன் எதிர்பார்த்து வரும் அரிய வானியல் நிகழ்வுகளில் ஒன்றான முழு சூரிய கிரகணம், 2027 ஆகஸ்ட் 2 அன்று நிகழ உள்ளது. சுமார் 6 நிமிடம் 23 வினாடிகள் நீடிக்கும் இந்த நிகழ்வை, 21ஆம் நூற்றாண்டின் மிக நீண்ட முழு சூரிய கிரகணமாக நாசா அறிவித்துள்ளது. இதனால், பல பகுதிகளில் பகல் நேரத்திலேயே இருள் சூழும் அபூர்வ காட்சி உருவாகும் என விஞ்ஞானிகள் தெரிவிக்கின்றனர்.

2026 முதல் 2028 வரையிலான காலகட்டத்தில் மூன்று முழு சூரிய கிரகணங்கள் நிகழவுள்ளன. அவற்றில் 2027ஆம் ஆண்டு நடைபெறவிருக்கும் இந்த முழு சூரிய கிரகணம் உலகளவில் அதிக கவனத்தை ஈர்த்துள்ளது. இதற்கு முன்பு இதேபோன்ற நீண்ட நேர கிரகணம் 1991ஆம் ஆண்டில் பதிவாகியிருந்தது குறிப்பிடத்தக்கது.

இதையும் படிங்க: Solar Eclipse: 7 நிமிடங்கள் 31 வினாடிகள்.. இருளில் தவிக்கப்போகும் பூமி..! 

ஏன் இந்த கிரகணம் சிறப்பு?

சந்திரன் தனது சுற்றுப்பாதையில் பூமிக்கு மிக அருகில் இருக்கும் நிலையில் பயணிக்கும் போது, சூரியனை முழுமையாக மறைக்கும். இதனால் சூரிய ஒளி பூமியை அடையாமல் நீண்ட நேரம் நிழல் நிலை உருவாகும். கிரகணத்தின் உச்ச நேரத்தில் சூரியனின் வெளிப்புற வளிமண்டலமான கொரோனாவை தெளிவாகக் காணும் வாய்ப்பும் கிடைக்கும்.

வானியல் ஆய்வாளர்கள் மற்றும் விண்வெளி ஆர்வலர்களுக்கு இந்த நிகழ்வு முக்கியமானதாக கருதப்படுகிறது. குறிப்பாக, சூரியனின் வெளிப்புற அமைப்புகளை ஆய்வு செய்வதற்கும் இந்த கிரகணம் அரிய வாய்ப்பை வழங்குகிறது.

எந்த நாடுகளில் தென்படும்?

இந்த கிரகணம் உலகின் அனைத்து பகுதிகளிலும் காட்சியளிக்காது. ஸ்பெயினின் தெற்குப் பகுதியில் தொடங்கி, வட ஆப்பிரிக்கா மற்றும் மத்திய கிழக்கு நாடுகள் வழியாக அதன் முழு பாதை செல்லும் என கணிக்கப்பட்டுள்ளது.

குறிப்பாக எகிப்தின் புகழ்பெற்ற லக்ஸர் நகரில் சுமார் 6 நிமிடம் 19 வினாடிகள் வரை முழு கிரகணத்தை தெளிவாகக் காண முடியும் என்று வானியல் நிபுணர்கள் தெரிவித்துள்ளனர். இதனால் அந்த பகுதி உலகம் முழுவதிலிருந்தும் சுற்றுலாப் பயணிகள் மற்றும் ஆராய்ச்சியாளர்களை ஈர்க்கும் மையமாக மாறும் என எதிர்பார்க்கப்படுகிறது.

இந்தியாவில் தெரியுமா?

2027 ஆகஸ்ட் 2 அன்று நடைபெறும் இந்த சூரிய கிரகணம் இந்தியாவின் எந்தப் பகுதியிலும் நேரடியாகத் தெரியாது. இதனால் இந்தியாவுக்கு ஜோதிட ரீதியான சூதக் கால விதிகள் அல்லது பிற ஆன்மீக நடைமுறைகள் பொருந்தாது என கூறப்படுகிறது.

இருப்பினும், இந்த அரிய விண்வெளி நிகழ்வை காண விரும்புவோர் நாசாவின் அதிகாரப்பூர்வ இணைய தளங்கள் மற்றும் யூடியூப் ஒளிபரப்புகள் மூலம் நேரலையாகக் கண்டு ரசிக்கலாம். மேலும், இதுபோன்ற நீண்ட முழு சூரிய கிரகணத்தை மீண்டும் காண உலகம் 2114ஆம் ஆண்டு வரை காத்திருக்க வேண்டியிருக்கும் என வானியல் கணிப்புகள் தெரிவிக்கின்றன.