கட்சியில் இணையலாம்... ஆனால் பதவியிலாம் கிடையாது! எடப்பாடியிடம் சரணடைந்தும் பலன் இல்லாமல் தவிக்கும் வேலுமணி டீம்! பின்னணியில் இருக்கும் லீமா ரோஸ்...!!!

2026 சட்டப்பேரவைத் தேர்தலுக்குப் பிறகு அதிமுகவில் உருவான உட்கட்சி மோதல் தற்போது வெளிப்படையான அதிகாரப் போட்டியாக மாறியுள்ளது. பொதுச் செயலாளர் எடப்பாடி பழனிசாமியின் தலைமையை எதிர்த்து செயல்பட்ட அதிருப்தி அணி, தவெக அரசுக்கு ஆதரவு தெரிவித்ததன் மூலம் அரசியல் வட்டாரத்தில் பெரும் பரபரப்பை ஏற்படுத்தியது. ஆனால் அமைச்சரவை விரிவாக்கத்தில் எதிர்பார்த்த பலன் கிடைக்காததால், அந்த அணிக்குள்ளேயே தற்போது குழப்பம் உருவாகியுள்ளதாக தகவல்கள் வெளியாகியுள்ளன.

நம்பிக்கை வாக்கெடுப்பால் வெளிச்சத்துக்கு வந்த பிளவு

தொடர் தேர்தல் தோல்விகளுக்குப் பிறகு “கட்சியில் மாற்றம் தேவை” என்ற கருத்து அதிமுகவின் பல்வேறு நிலைகளில் பேசப்பட்டு வந்தது. இந்த சூழலில் சி.வி.சண்முகம், எஸ்.பி.வேலுமணி, சி.விஜயபாஸ்கர் உள்ளிட்ட முக்கிய நிர்வாகிகள் தனி அணியாக இயங்கத் தொடங்கினர்.

இதையும் படிங்க: எடப்பாடி தலையில் இடியை இறக்கிய எம்.எல்.ஏக்கள்.... சொல்லி கேட்காததால் வேலையை காட்டிய மார்டின் குடும்பம்! லீமா ரோஸ்ஸின் வில்லங்க வேலை!!!

இதையடுத்து முதல்வர் விஜய் தலைமையிலான தவெக அரசுக்கு நடந்த நம்பிக்கை வாக்கெடுப்பில், எடப்பாடி பழனிசாமியின் உத்தரவை மீறி சில அதிமுக எம்.எல்.ஏக்கள் ஆதரவு தெரிவித்தனர். இதனால் அதிமுகவில் ஏற்பட்டிருந்த பிளவு பகிரங்கமானது.

இந்த விவகாரத்தில் 25 எம்.எல்.ஏக்கள் மீது நடவடிக்கை எடுக்க வேண்டும் என ஈபிஎஸ் தரப்பு சபாநாயகரிடம் மனு அளித்தது. அதற்கு பதிலடியாக, ஈபிஎஸ் ஆதரவாளர்கள் மீது நடவடிக்கை எடுக்க வேண்டும் என வேலுமணி தரப்பும் மனு கொடுத்தது. இதனால் பிரச்னை சட்டப்பேரவை மற்றும் நீதிமன்றம் வரை செல்லும் சூழல் உருவாகியுள்ளது.

அமைச்சரவை விரிவாக்கம் மாற்றிய அரசியல் கணக்கு

தவெக அரசை ஆதரித்ததற்குப் பதிலாக புதிய அமைச்சரவையில் தங்களுக்கு 4 அல்லது 5 அமைச்சர் பதவிகள் கிடைக்கும் என்ற எதிர்பார்ப்பு அதிருப்தி அணியினரிடம் இருந்ததாக கூறப்படுகிறது. இதற்காக முதல்வர் விஜய், சி.வி.சண்முகத்தின் இல்லத்திற்கே சென்று சில எம்.எல்.ஏக்களை சந்தித்ததாகவும் அரசியல் வட்டாரங்களில் தகவல்கள் பரவின.

ஆனால் சமீபத்திய அமைச்சரவை விரிவாக்கத்தில் அதிமுக அதிருப்தி அணியைச் சேர்ந்த எவருக்கும் வாய்ப்பு வழங்கப்படவில்லை. இதனால் அந்த அணிக்குள் கடும் அதிருப்தி ஏற்பட்டதாக கூறப்படுகிறது.

இதையடுத்து வேலுமணி தரப்பைச் சேர்ந்த 8 எம்.எல்.ஏக்கள் அமைதியாக மீண்டும் எடப்பாடி பழனிசாமி அணிக்குத் திரும்பியுள்ளதாக தகவல்கள் தெரிவிக்கின்றன. ஆரம்பத்தில் 25 பேராக இருந்த அணியின் பலம் தற்போது 17 ஆகக் குறைந்துள்ளதாக கூறப்படுகிறது.

பொதுக்குழு கூட்டத்தை நோக்கிய அடுத்த கட்ட மோதல்

மீண்டும் ஈபிஎஸ் அணியில் சேர்ந்த எம்.எல்.ஏக்கள், தாங்கள் இழந்த மாவட்டச் செயலாளர் உள்ளிட்ட பதவிகளை மீண்டும் கேட்டபோது, “கட்சியில் இணையலாம், ஆனால் பதவிகள் வழங்க முடியாது” என எடப்பாடி பழனிசாமி தரப்பு தெளிவாக தெரிவித்ததாக தகவல்கள் வெளியாகியுள்ளன.

இதற்கிடையே, அமைச்சர் ஆதவ் அர்ஜுனாவின் மாமியாரும் லால்குடி எம்.எல்.ஏவுமான லீமா ரோஸ் மீது அதிமுக வட்டாரங்களில் பல்வேறு குற்றச்சாட்டுகள் முன்வைக்கப்படுகின்றன. தவெக அரசுக்கு ஆதரவு அளித்தால் அமைச்சர் பதவி மற்றும் பல சலுகைகள் கிடைக்கும் என பேச்சுவார்த்தை நடத்தியதாகவும் கூறப்படுகிறது.

ஆனால் சி.வி.சண்முகம் மட்டும் இன்னும் பின்வாங்காமல், பொதுக்குழுவைக் கூட்டி ஈபிஎஸின் பதவியை சவாலுக்கு உட்படுத்தும் முயற்சியில் ஈடுபட்டுள்ளதாக தகவல்கள் தெரிவிக்கின்றன. அதற்குப் பதிலடியாக ஈபிஎஸ் தரப்பும் தனியாக பொதுக்குழுவைக் கூட்டத் தயாராகி வருவதால், அடுத்த சில வாரங்களில் அதிமுக அரசியலில் முக்கிய திருப்பங்கள் ஏற்படும் என எதிர்பார்க்கப்படுகிறது.

இதையும் படிங்க: அதிமுக MLA பதவியும் போச்சு... தவெக அமைச்சர் பதவிக்கும் இனி வழியில்லை! வேலுமணி அணிக்கு அதிரடியாக செக் வைத்த ஆளுநர்.!!!