ஓட்டுக்கு பணம் இல்ல பரிசு பொருள் கொடுத்தால் ஜோலி முடிந்தது.....60 நிமிடத்தில் அதிரடி ஆக்ஷன் எடுக்கும் புது ஆப்! தேர்தல் அதிகாரியின் கடுமையான தேர்தல் விதிமுறைகள்!!!

புதுச்சேரி சட்டப்பேரவைத் தேர்தலை முன்னிட்டு தேர்தல் ஆணையம் கண்காணிப்பை கடுமையாக்கியுள்ளது. வாக்காளர்களை பணம் அல்லது பரிசுப் பொருட்களால் கவரும் முயற்சிகளைத் தடுக்க பல்வேறு நடவடிக்கைகள் மேற்கொள்ளப்பட்டுள்ளன. குறிப்பாக பொதுமக்கள் நேரடியாக புகார் அளிக்கக்கூடிய வகையில் சி-விஜில் செயலி பயன்படுத்துமாறு தேர்தல் அதிகாரிகள் அறிவுறுத்தியுள்ளனர்.

புகார்களுக்கு உடனடி நடவடிக்கை

புதுச்சேரி தலைமை தேர்தல் அதிகாரி ஜவகர் தெரிவித்ததாவது, வாக்காளர்களுக்கு பணம் அல்லது பரிசுப் பொருட்கள் வழங்கப்படும் சம்பவங்கள் குறித்து சி-விஜில் செயலி மூலம் புகார் அளிக்கலாம். பெறப்படும் ஒவ்வொரு புகாருக்கும் அதிகபட்சம் ஒரு மணி நேரத்திற்குள் நடவடிக்கை எடுக்கப்படும் என்றும் அவர் எச்சரித்துள்ளார்.

பாதுகாப்பு மற்றும் தேர்தல் பணியாளர்கள்

புதுச்சேரியில் நடைபெறவுள்ள தேர்தலுக்காக மொத்தம் 1099 வாக்குச்சாவடிகள் அமைக்கப்பட்டுள்ளன. இவற்றில் பணியாற்றுவதற்காக சுமார் 5000 தேர்தல் பணியாளர்கள் நியமிக்கப்பட்டுள்ளனர். பாதுகாப்பு ஏற்பாடுகளுக்காக 10 கம்பெனி தொழில் பாதுகாப்புப் படையினர் மற்றும் 4000 போலீசார் பணியில் ஈடுபடுத்தப்படவுள்ளனர்.

இதையும் படிங்க: அதிரடியாக அமலுக்கு வந்த தேர்தல் நடத்தை விதிமுறைகள்! என்னென்ன தெரியுமா? மக்களே எச்சரிக்கை....முழு விவரம் இதோ..!!!

சமூக வலைதள கண்காணிப்பு

தேர்தல் விதிமுறைகளை மீறும் விளம்பரங்கள் மற்றும் தவறான தகவல்கள் பரவுவதைத் தடுக்க தனிப்பட்ட கண்காணிப்புக் குழுக்கள் அமைக்கப்பட்டுள்ளன. மேலும் சமூக வலைதளங்களில் பரவும் தகவல்களை சரிபார்க்க ‘மெய்ப்பொருள்’ என்ற செயலி பயன்படுத்தப்பட உள்ளதாக தேர்தல் அதிகாரிகள் தெரிவித்துள்ளனர்.

மாற்றுத்திறனாளிகள் மற்றும் பெண்களுக்கான வசதி

இந்த தேர்தலில் அனைவரும் சுலபமாக வாக்களிக்க வசதிகள் செய்யப்பட்டுள்ளன. ஒவ்வொரு வாக்குச்சாவடியிலும் மாற்றுத்திறனாளிகளுக்காக வீல் சேர் மற்றும் தன்னார்வலர்கள் ஏற்பாடு செய்யப்பட்டுள்ளனர். மேலும் பெண்களால் மட்டுமே நிர்வகிக்கப்படும் 30 சிறப்பு வாக்குச்சாவடிகளும் அமைக்கப்பட்டுள்ளன.

கடுமையான தேர்தல் விதிமுறைகள்

தேர்தல் தொடர்பான புகார்களுக்கு பொதுமக்கள் 1950 என்ற உதவி எண்ணைத் தொடர்பு கொள்ளலாம். வாக்குச்சாவடிக்குள் செல்போன் கொண்டு செல்ல தடை விதிக்கப்பட்டுள்ளதாகவும் அறிவிக்கப்பட்டுள்ளது. மேலும் மாவட்ட ஆட்சியரின் அனுமதி இல்லாமல் எந்தவித தேர்தல் விளம்பரமும் செய்யக் கூடாது என்றும், விதிமுறைகளை மீறினால் தேர்தல் ஆணையம் கடுமையான நடவடிக்கை எடுக்கும் என்றும் அதிகாரிகள் எச்சரித்துள்ளனர்.

தேர்தல் நேர்மையாகவும் அமைதியாகவும் நடைபெற பொதுமக்கள் ஒத்துழைக்க வேண்டும் என அதிகாரிகள் வலியுறுத்தியுள்ளனர். விதிமுறைகள் மீறப்படுவதை கண்டால் உடனடியாக தகவல் அளிப்பதன் மூலம் ஜனநாயகத்தை பாதுகாக்க மக்கள் முன்வர வேண்டும் என்றும் கேட்டுக்கொள்ளப்பட்டுள்ளது.

இதையும் படிங்க: திடீர் ட்விஸ்ட்...கூட்டணி குறித்து தவெக தரப்பின் அதிகாரப்பூர்வ அறிவிப்பு! சூடு பிடிக்கும் அரசியல் கலம்!!!