வீட்டுக்குள் எமனாக மாறிய மோட்டார் சைக்கிள்! தூக்கத்திலேயே பரிதாபமாக பறிபோன 4 உயிர்கள்! அதிர்ச்சி சம்பவம்!!!

வீட்டுக்குள் வாகனங்களை இயக்குவது எவ்வளவு ஆபத்தானது என்பதை நினைவூட்டும் சோக சம்பவம் ஒன்று ஆந்திர மாநிலத்தில் நடந்துள்ளது. மோட்டார் சைக்கிளை வீட்டுக்குள் இயக்கியதால் வெளியான கார்பன் மோனாக்சைடு வாயு காரணமாக ஒரே குடும்பத்தைச் சேர்ந்த நான்கு பேர் உயிரிழந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

ஒரே குடும்பத்தில் 4 பேர் உயிரிழப்பு

ஆந்திர மாநிலம் பங்கனூர் பகுதியில் நடந்த இந்த சம்பவத்தில், 70 வயது முதியவர் ராமச்சந்திரய்யா, அவரது 15 வயது பேரன் கார்த்திக் மற்றும் 8 வயது இரட்டைப் பேத்திகள் சரிதா, சந்தனா ஆகியோர் பரிதாபமாக உயிரிழந்தனர். அவர்கள் வீட்டுக்குள் தூங்கிக் கொண்டிருந்தபோது, மோட்டார் சைக்கிளில் இருந்து வெளியான விஷ வாயு காரணமாக மூச்சுத்திணறல் ஏற்பட்டதாக கூறப்படுகிறது.

மெக்கானிக்கின் ஆலோசனை காரணமான விபத்து

தகவலின்படி, சலூன் கடை நடத்தி வரும் முரளி தனது மோட்டார் சைக்கிளில் ஏற்பட்ட கோளாறை சரிசெய்ய மெக்கானிக்கிடம் கொடுத்துள்ளார். அப்போது பிஸ்டனை மாற்றிய மெக்கானிக், பைக்கை இரவு முழுவதும் ஆன் நிலையில் வைத்திருக்குமாறு கூறியதாக தெரிவிக்கப்படுகிறது. இதை நம்பிய முரளி, பைக்கை வீட்டிற்குள் நிறுத்தி அனைத்து ஜன்னல்களையும் மூடி வைத்து இரவு முழுவதும் இயங்கவிட்டுள்ளார். இதனால் வெளியான விஷ வாயு வீடு முழுவதும் பரவியதாக போலீசார் தெரிவித்துள்ளனர்.

இதையும் படிங்க: இட்லி, வேர்க்கடலை சட்னி சாப்பிட்ட 11 வயது சிறுமி உயிரிழப்பு! திருவண்ணாமலையில் பெரும் பரபரப்பு!

தூக்கத்திலேயே நடந்த சோகம்

சம்பவம் நடந்த நேரத்தில் முரளியும் அவரது மனைவியும் மொட்டை மாடியில் தூங்கியதால் உயிர் தப்பினர். ஆனால் வீட்டுக்குள் தூங்கிக் கொண்டிருந்த முதியவர் மற்றும் மூன்று குழந்தைகள் மீது கார்பன் மோனாக்சைடு வாயு தாக்கம் ஏற்பட்டு, அவர்கள் தூக்கத்திலேயே உயிரிழந்தனர்.

போலீசார் விசாரணை

ஞாயிற்றுக்கிழமை காலை அவர்கள் உயிரிழந்த நிலையில் கிடந்ததை பார்த்த குடும்பத்தினர் கதறி அழுதனர். தகவலறிந்து வந்த போலீசார் உடல்களை மீட்டு உடற்கூராய்வுக்கு அனுப்பி வைத்தனர். இந்த சோக சம்பவம் குறித்து வழக்குப்பதிவு செய்து தீவிர விசாரணை நடத்தி வருகின்றனர்.

மூடிய அறைகளுக்குள் வாகனங்களை இயக்குவது உயிருக்கு ஆபத்தானது என்பதை இந்த சம்பவம் மீண்டும் உணர்த்துகிறது. பொதுமக்கள் இத்தகைய தவறுகளை தவிர்த்து, பாதுகாப்பு விதிகளை கடைப்பிடிப்பது அவசியம் என அதிகாரிகள் வலியுறுத்துகின்றனர்.

இதையும் படிங்க: அதிர்ச்சி! காலையில் பள்ளிக்குச் சென்ற 5 வயது சிறுமி திடீரென மயங்கி உயிரிழப்பு! சிவகங்கையில் பெரும் சோகம்!