தவறுதலாக UPI-ல் பணம் அனுப்பிவிட்டீர்களா? பதற்றப்பட வேண்டாம்… உடனே இதை செய்யுங்கள்!

UPI பரிவர்த்தனை :

Google Pay, PhonePe, BHIM உள்ளிட்ட UPI செயலிகள் மூலம் பணம் அனுப்புவது தற்போது மிகவும் எளிதாகிவிட்டது. ஆனால் அவசரத்தில் தவறான நபருக்கு பணம் அனுப்பிவிட்டால், அதை எப்படி திரும்பப் பெறுவது என்பது பலருக்கும் தெரியாமல் இருக்கிறது. இதுபோன்ற சூழலில் பதற்றப்படாமல், உடனடியாக புகார் அளிப்பது முக்கியம்.

உதவி எண்கள் :

UPI மூலம் தவறுதலாக பணம் அனுப்பியிருந்தால், முதலில் நீங்கள் பயன்படுத்திய செயலியின் வாடிக்கையாளர் சேவை மையத்தைத் தொடர்புகொண்டு புகார் அளிக்கலாம். Google Pay-க்கு 1800 419 0157, PhonePe-க்கு 080 6872 7374 என்ற உதவி எண்கள் இருக்கின்றன.

தயாராக வைத்திருக்க வேண்டிய தகவல்கள் :

அதேபோல், UPI பரிவர்த்தனை தொடர்பான புகார்களுக்கு NPCI-யின் அதிகாரப்பூர்வ புகார் வழிமுறைகளையும் பயன்படுத்தலாம். பணம் அனுப்பிய பரிவர்த்தனை விவரங்கள், UTR/Transaction ID உள்ளிட்ட தகவல்களைத் தயாராக வைத்திருப்பது புகார் அளிக்கும்போது உதவும்.

தாமதம் வேண்டாம் :

தவறுதலாக அனுப்பிய பணம் தானாகவே உடனடியாக திரும்பிவிடும் என்று உறுதி இல்லை. பணம் சென்றுள்ள வங்கி மற்றும் பெறுநரின் வங்கியுடன் தொடர்புடைய நடைமுறைகளின் அடிப்படையில்தான் அடுத்த நடவடிக்கை இருக்கும் என்பதால், தாமதிக்காமல் புகார் அளிப்பது அவசியம்.

புகார் அளிக்கும் போது இது கூடாது :

மேலும், சமூக வலைதளங்களில் பரவும் உதவி எண்களை நம்பாமல், Google Pay, PhonePe, உங்கள் வங்கி அல்லது NPCI-யின் அதிகாரப்பூர்வ சேனல்கள் மூலமாக மட்டுமே புகார் அளிக்க வேண்டும். குறிப்பாக OTP, UPI PIN, CVV போன்ற ரகசிய தகவல்களை யாரிடமும் பகிரக்கூடாது.