இனி இந்த தப்பை பண்ணக்கூடாது...! மதுராந்தகம், தாராபுரம் தேர்தல் கற்பித்த பாடம்... முதல்வர் விஜய் எடுத்த திடீர் முடிவு! அடுத்த அரசியல் வியூகம் இதுதான்...!!!
மதுராந்தகம், தாராபுரம் இடைத்தேர்தலில் அதிக வாக்குப்பதிவு தவெகவுக்கு சவாலாக மாறியுள்ளது. வேட்பாளர் தேர்வு, விஜய்யின் பிரசாரம் கவனம் பெற்றுள்ளது.
by
மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் வாக்குப்பதிவு நிறைவடைந்துள்ளது. மதுராந்தகத்தில் 85 சதவீதத்துக்கும் அதிகமாகவும், தாராபுரத்தில் 80 சதவீதத்துக்கும் மேலாகவும் வாக்குகள் பதிவாகியுள்ளன. அதிக வாக்குப்பதிவு அரசியல் கட்சிகளின் கணக்குகளை மாற்றியமைக்கும் சூழலை உருவாக்கியுள்ளது. குறிப்பாக, வெற்றியை உறுதி செய்ய முதலமைச்சர் விஜய் நேரடியாக களமிறங்கிய விதம் அரசியல் வட்டாரங்களில் கவனம் பெற்றுள்ளது.
வேட்பாளர் தேர்வில் எழுந்த அதிருப்தி
இரு தொகுதிகளிலும் கட்சி தாவி வந்த வேட்பாளர்களுக்கு மீண்டும் வாய்ப்பு வழங்கப்பட்டதே தவெகவுக்கு முக்கிய சவாலாக அமைந்ததாக கூறப்படுகிறது. அதிமுகவில் இருந்து விலகி தமிழக வெற்றிக் கழகத்தில் இணைந்த முன்னாள் எம்.எல்.ஏ.க்களான மரகதம் குமரவேல், பி. சத்யபாமா ஆகியோர் முறையே மதுராந்தகம், தாராபுரத்தில் போட்டியிட்டனர்.
இதையும் படிங்க: எச்சரித்த உளவுத்துறை... தாராபுரத்தில் இறங்கி அடித்த முதல்வர் விஜய்! பின்னணியில் இருக்கும் ரகசியம்..!!!
பதவி மற்றும் அரசியல் வாய்ப்புக்காக கட்சி மாறியவர்களுக்கு மீண்டும் தேர்தல் வாய்ப்பு வழங்கப்பட்டிருப்பதாக தொகுதி மக்களில் ஒரு தரப்பினர் அதிருப்தி தெரிவித்ததாக கூறப்படுகிறது. அதேநேரம், வேட்பாளர் தேர்வில் சொந்தக் கட்சி நிர்வாகிகளிடையேயும் முழுமையான ஒற்றுமை இல்லை என்ற தகவல்கள் வெளியாகின. இதனால், களப்பணியிலும் எதிர்பார்த்த ஒருங்கிணைப்பு பாதிக்கப்பட்டதாக அரசியல் வட்டாரங்கள் தெரிவித்தன.
களத்தில் நேரடியாக இறங்கிய விஜய்
வேட்பாளர்களின் தனிப்பட்ட செல்வாக்கை மட்டுமே நம்பாமல், கட்சித் தலைவர் விஜய் தனது பிரசாரத்தை தீவிரப்படுத்தினார். கிராமம் கிராமமாக சென்று ரோட்ஷோ நடத்தியதுடன், டிராக்டர் ஓட்டுவது, மாட்டு வண்டியில் பயணம் செய்வது, கிராமத்து டீக்கடைகளில் பொதுமக்களுடன் உரையாடுவது என வித்தியாசமான பிரசார முறைகளையும் அவர் மேற்கொண்டார்.
வழக்கமான குறுகிய நேர பிரசாரத்தைத் தாண்டி நீண்ட நேரம் தொகுதிகளில் செலவிட்ட விஜய், தனது ஓய்வு நேரத்தையும் குறைத்துக்கொண்டு வாக்கு சேகரிப்பில் ஈடுபட்டதாக கூறப்படுகிறது. அமைச்சர்கள் மற்றும் கட்சி நிர்வாகிகளையும் தொகுதிகளில் முகாமிடச் செய்தார். முதலமைச்சரே நேரடியாக களத்தில் இறங்க வேண்டிய நிலை ஏற்பட்டது, இந்த இடைத்தேர்தல் தவெகவுக்கு எவ்வளவு முக்கியமானதாக இருந்தது என்பதையும் வெளிப்படுத்தியது.
அடுத்த இடைத்தேர்தல்களில் மாறுமா வியூகம்?
மதுராந்தகம், தாராபுரம் தேர்தல் கள அனுபவம் அடுத்ததாக எதிர்கொள்ளவுள்ள 4 தொகுதிகளுக்கான தவெகவின் தேர்தல் வியூகத்தில் மாற்றத்தை ஏற்படுத்தும் என எதிர்பார்க்கப்படுகிறது. குறிப்பாக, கட்சி மாறி வந்தவர்களுக்கு வாய்ப்பு வழங்குவதற்கு பதிலாக, நீண்டகாலமாக கட்சியில் பணியாற்றி வரும் உள்ளூர் நிர்வாகிகள் மற்றும் தீவிர ஆதரவாளர்களுக்கு முன்னுரிமை அளிப்பது குறித்து தலைமை கவனம் செலுத்தலாம் என கூறப்படுகிறது.
அக்டோபர் 9-ம் தேதி நடைபெற உள்ள வாக்கு எண்ணிக்கையே இறுதி முடிவைத் தீர்மானிக்க உள்ளது. வெற்றி, தோல்வி எதுவாக இருந்தாலும், இந்த இரண்டு தொகுதிகளின் கள நிலவரம் தவெகவின் எதிர்கால வேட்பாளர் தேர்வு மற்றும் இடைத்தேர்தல் வியூகத்தில் தாக்கத்தை ஏற்படுத்தும் என்பதே அரசியல் பார்வையாளர்களின் எதிர்பார்ப்பாக உள்ளது.
