புதிய கூட்டணியால் கெத்து காட்டும் தவெக....! சூடு பிடிக்கும் இடைத்தேர்தல் களம்...!!!

தமிழக அரசியலில் புதிய கூட்டணி கணக்குகள் குறித்து பரபரப்பு ஏற்பட்டுள்ள நிலையில், தமிழ் மாநில காங்கிரஸ் தலைவர் ஜி.கே. வாசனின் அடுத்தகட்ட அரசியல் நகர்வு கவனம் பெற்றுள்ளது. மதுராந்தகம், தாராபுரம் சட்டப்பேரவை இடைத்தேர்தலில் தமிழக வெற்றிக் கழகத்தின் கூட்டணிக்கு தமாகா ஆதரவு அளிப்பதாக அவர் அறிவித்துள்ளார். இதனால் இரு கட்சிகளுக்கும் இடையிலான அரசியல் நெருக்கம் குறித்து விவாதம் அதிகரித்துள்ளது.

தவெக கூட்டணிக்கு தமாகா ஆதரவு

வரும் அக்டோபர் 6-ம் தேதி நடைபெற உள்ள மதுராந்தகம், தாராபுரம் இடைத்தேர்தலில் தமிழக வெற்றிக் கழகத்தின் மதச்சார்பற்ற சமூகநீதி வெற்றிக் கூட்டணிக்கு ஆதரவு அளிப்பதாக ஜி.கே. வாசன் செப்டம்பர் 24-ம் தேதி அறிவித்தார். தமாகாவின் இந்த முடிவு, தமிழக அரசியல் களத்தில் முக்கிய நகர்வாக பார்க்கப்படுகிறது.

இதையும் படிங்க: நான் சொன்னது வேறு.. பிரேமலதா புரிந்துகொண்டது வேறு.. திருமாவளவன் விளக்கம்!

NDA-வில் இருந்து விலகிய தமாகா

முன்னதாக, கடந்த ஜூன் மாதம் பாஜக தலைமையிலான தேசிய ஜனநாயகக் கூட்டணியில் இருந்து தமிழ் மாநில காங்கிரஸ் விலகியது. கட்சியின் நிர்வாகிகள் மற்றும் தொண்டர்களின் கருத்துகளின் அடிப்படையில், தமிழகத்தில் தனித்த அரசியல் அடையாளத்துடன் செயல்பட்டு கட்சியை வலுப்படுத்த முடிவு செய்ததாக ஜி.கே. வாசன் தெரிவித்திருந்தார்.

அடுத்தகட்ட கூட்டணி குறித்து எதிர்பார்ப்பு

இந்நிலையில், இடைத்தேர்தலில் தவெக கூட்டணிக்கு தமாகா வெளிப்படையாக ஆதரவு தெரிவித்திருப்பது இரு கட்சிகளுக்கும் இடையிலான அரசியல் தொடர்பை மேலும் கவனத்திற்கு கொண்டு வந்துள்ளது. இருப்பினும், தமாகா அதிகாரப்பூர்வமாக தவெக கூட்டணியில் இணைவது குறித்து இதுவரை உறுதியான அறிவிப்பு வெளியாகவில்லை. எனவே, இடைத்தேர்தல் ஆதரவைத் தொடர்ந்து அடுத்தகட்ட அரசியல் நகர்வு எவ்வாறு இருக்கும் என்பதே தற்போது தமிழக அரசியல் வட்டாரங்களில் எதிர்பார்ப்பாக உள்ளது.

இதையும் படிங்க: தவெக பக்கம் வந்துவிட்டு வீர வசனமா? அடக்கி வாசியுங்கள்.. காங்கிரஸ், விசிகவை கடுமையாக சாடிய அன்புமணி!