காதல் கணவர் இல்லாத நேரத்தில் வீடு புகுந்து பெண் வீட்டார் கடத்தல்! அத்துமீறி நுழைந்து தரதரவென இழுத்து சென்று நடந்த கொடூரம்! வாலிபரின் பரபரப்பு குற்றச்சாட்டு...!!!

கன்னியாகுமரி மாவட்டம் சாமிதோப்பு பகுதியில் காதல் திருமணம் செய்த இளம்பெண்ணை, அவரது பெற்றோர் உள்ளிட்ட 20-க்கும் மேற்பட்டோர் வீட்டுக்குள் புகுந்து தாக்கி கடத்திச் சென்றதாக புகார் எழுந்துள்ளது. பின்னர் அந்தப் பெண்ணுக்கு விருப்பமில்லாமல் வேறொருவருடன் கட்டாயத் திருமணம் செய்து வைக்கப்பட்டதாகவும் கூறப்படுகிறது. இதுதொடர்பாக தென்தாமரைகுளம் போலீசார் 21 பேர் மீது வழக்குப்பதிவு செய்துள்ளனர்.

வீட்டுக்குள் புகுந்து இளம்பெண் கடத்தல்

சாமிதோப்பு பகுதியைச் சேர்ந்த ஜெகன் (35), அதே பகுதியைச் சேர்ந்த திவ்யதர்ஷினி (20) என்பவரை காதலித்து, கடந்த 2025-ம் ஆண்டு திருமணம் செய்து கொண்டார். திருமணத்திற்கு பெண் வீட்டார் எதிர்ப்பு தெரிவித்திருந்ததாக கூறப்படுகிறது. இதுதொடர்பாக ஏற்கனவே காவல்துறையிலும் அவர்கள் எழுத்துப்பூர்வமாக புகார் அளித்திருந்தனர்.

இதையும் படிங்க: சொத்துதகராறில் ஆத்திரமடைந்த அண்ணி சமையலறை சப்பாத்தி கட்டையால்.... கொழுந்தனை ஒரே போடு...! அடுத்து நடந்த அதிர்ச்சி...!!!

இந்த நிலையில், ஜெகன் வீட்டில் இல்லாத நேரத்தில் அவரது மனைவி திவ்யதர்ஷினியை அழைத்துச் செல்ல அவரது தந்தை சுரேஷ், தாய் கவிதா உள்ளிட்ட 20-க்கும் மேற்பட்டோர் அங்கு வந்ததாக தெரிகிறது. வீட்டுக்குள் அத்துமீறி நுழைந்த அவர்கள், அங்கிருந்த ஜெகனின் தாயாரை மிரட்டியதுடன், திவ்யதர்ஷினியை தாக்கி தரதரவென இழுத்துச் சென்று காரில் ஏற்றிக் கொண்டு சென்றதாக புகார் தெரிவிக்கப்பட்டுள்ளது.

வேறொருவருடன் கட்டாயத் திருமணம்?

கடத்திச் செல்லப்பட்ட திவ்யதர்ஷினிக்கு அவரது விருப்பத்திற்கு மாறாக வேறொரு நபருடன் திருமணம் செய்து வைக்கப்பட்டதாக தகவல் வெளியாகியுள்ளது. இதனால் அதிர்ச்சியடைந்த ஜெகன், தனது காதல் மனைவியை மீட்டு தர வேண்டும் என போலீசாரிடம் முறையிட்டுள்ளார்.

தென்தாமரைகுளம் போலீசார் இந்த புகார் தொடர்பாக 21 பேர் மீது வழக்குப்பதிவு செய்து விசாரணை நடத்தி வருகின்றனர். இதையடுத்து, குற்றச்சாட்டுக்கு உள்ளானவர்களை கைது செய்து, திவ்யதர்ஷினியை மீட்டு தன்னிடம் ஒப்படைக்க வேண்டும் என ஜெகன் மற்றும் அவரது தாயார் மாவட்ட காவல் கண்காணிப்பாளர் அலுவலகத்தில் நேரில் மனு அளித்துள்ளனர்.

தற்போது பெண் கடத்தல் தொடர்பான புகாரின் அடிப்படையில் போலீசார் விசாரணையை தீவிரப்படுத்தியுள்ளனர். திவ்யதர்ஷினி எங்கு உள்ளார், அவரை அழைத்துச் சென்றது தொடர்பான குற்றச்சாட்டுகளில் யார் யார் ஈடுபட்டுள்ளனர் என்பது குறித்து போலீசார் விசாரித்து வருகின்றனர். காதல் திருமணம் தொடர்பாக இரு தரப்பினரிடமும் விசாரணை நடைபெற்று வருவதாக தெரிவிக்கப்பட்டுள்ளது.

இதையும் படிங்க: பெண் அரசு ஊழியர்களுக்கு இன்ப அதிர்ச்சி கொடுத்த தமிழக அரசு! சட்டப்பேரவையில் வெளியான அதிரடி அரசாணை..!!!