செஞ்சி சிறுமி வழக்கில் நடுராத்திரியில் 3 முறை தட்டப்பட்ட கதவு! கோவிலில் பூ போட்ட தாய்க்கு வந்த அந்த ஒரு செய்தி... 18 நாட்கள் கடந்து.. மர்ம நபரில் திடீர் திருப்பம்...!!!
விழுப்புரம் மாவட்டம் செஞ்சி அருகே 7 வயது சிறுமி ஹேமாவதி மாயமாகி 18 நாட்களைக் கடந்தும் தகவல் இல்லை. சிபிசிஐடி போலீசார் பல்வேறு கோணங்களில் விசாரணை நடத்தி வருகின்றனர்.
by
விழுப்புரம் மாவட்டம் செஞ்சி அருகே ஆலம்பூண்டி கிராமத்தைச் சேர்ந்த 7 வயது சிறுமி ஹேமாவதி மாயமாகி 18 நாட்களைக் கடந்தும் அவரைப் பற்றிய எந்த உறுதியான தகவலும் கிடைக்கவில்லை. பிறந்தநாள் கொண்டாடிய மறுநாள் அதிகாலையில் சிறுமி காணாமல் போனது குடும்பத்தினரை அதிர்ச்சியில் ஆழ்த்தியது. வழக்கு தற்போது சிபிசிஐடி விசாரணைக்கு மாற்றப்பட்டுள்ள நிலையில், சிறுமியைத் தேடும் பணி தொடர்ந்து நடைபெற்று வருகிறது.
பிறந்தநாள் கொண்டாடிய மறுநாள் மாயமான சிறுமி
ஆலம்பூண்டியைச் சேர்ந்த வடிவேலு, பவானி தம்பதியின் மகள் ஹேமாவதி. கடந்த அக்டோபர் 11ஆம் தேதி இரவு சிறுமியின் பிறந்தநாள் கொண்டாடப்பட்டது. மறுநாள், அக்டோபர் 12ஆம் தேதி அதிகாலையில் எழுந்து பார்த்தபோது குழந்தையைக் காணவில்லை. இதையடுத்து பெற்றோர் காவல் நிலையத்தில் புகார் அளித்தனர். நீண்ட தேடுதலுக்குப் பிறகும் சிறுமி கிடைக்காததால், வழக்கு சிபிசிஐடி விசாரணைக்கு மாற்றப்பட்டது.
மர்ம நபர் குறித்து விசாரணை தீவிரம்
சிபிசிஐடி டிஎஸ்பி கீதா தலைமையிலான குழுவினர் பல்வேறு கோணங்களில் விசாரணை நடத்தி வருகின்றனர். சிறுமியின் தந்தை, தாய் பவானி, சகோதரி, பாட்டி ஆகியோரிடம் தனித்தனியாக விசாரணை மேற்கொள்ளப்பட்டுள்ளது. இதற்கிடையே, சிறுமி காணாமல் போன நாளன்று அருகில் வசிக்கும் மணிமேகலை என்ற மூதாட்டியின் வீட்டுக் கதவை மர்ம நபர் ஒருவர் மூன்று முறை தட்டியதாகத் தகவல் வெளியாகியுள்ளது. அந்த நபர் யார், இந்தச் சம்பவத்துக்கும் சிறுமி மாயமானதற்கும் ஏதேனும் தொடர்பு உள்ளதா என்பதையும் அதிகாரிகள் ஆராய்ந்து வருகின்றனர்.
மகள் திரும்பி வருவாள் என்ற நம்பிக்கையில் தாய்
ஒருபுறம் போலீசார் விசாரணையைத் தீவிரப்படுத்தியுள்ள நிலையில், மறுபுறம் மகள் விரைவில் வீடு திரும்புவாள் என்ற நம்பிக்கையில் தாய் பவானி கோவில்களில் வழிபாடு செய்து வருகிறார். வீட்டின் அருகே உள்ள விநாயகர் கோவிலில் தினமும் கற்பூரம் ஏற்றி வேண்டி வருவதாகக் கூறப்படுகிறது. சிவன் கோவிலில் பூ போட்டுப் பார்த்தபோது மகள் உயிருடன் இருப்பதாகக் கூறப்பட்டதால், அவர் மீட்கப்படுவார் என்ற நம்பிக்கையுடன் காத்திருக்கிறார். 18 நாட்களைக் கடந்தும் சிறுமி குறித்த தகவல் கிடைக்காததால், குடும்பத்தினரின் கவலை நீடிக்கிறது.
