7 வயது சிறுமி மாயமான வழக்கில் தாயை சுற்றி வளைத்த சிபிசிஐடி! திடீர் பிறந்தநாள் கொண்டாட்டம்... கதவை திறந்து வைத்து தூங்கியது ஏன்..? சாமியாருடம் தொடர்பு... சிறுமியின் அலறல் சத்தம்..!!!

விழுப்புரம் மாவட்டம் செஞ்சி அருகே மாயமான 7 வயது சிறுமி ஹேமாவதியைத் தேடும் பணி இரண்டு வாரங்களைக் கடந்தும் தொடர்ந்து வருகிறது. இந்த வழக்கில் சிறுமியின் தாய் பவானியிடம் சிபிசிஐடி அதிகாரிகள் 3-வது நாளாக விசாரணை நடத்தி வருகின்றனர். சிறுமி காணாமல் போனது தொடர்பாகப் பல்வேறு கோணங்களில் விசாரணை தீவிரப்படுத்தப்பட்டுள்ளது.

தாயிடம் அடுக்கடுக்கான கேள்விகள்

ஆலம்பூண்டியைச் சேர்ந்த ஹேமாவதியைக் கண்டுபிடிக்க உள்ளூர் காவல்துறையினர் 10 நாட்களாகத் தேடியும் முக்கியத் தடயம் கிடைக்கவில்லை. இதையடுத்து வழக்கு சிபிசிஐடி விசாரணைக்கு மாற்றப்பட்டது. டிஎஸ்பி கீதா தலைமையிலான அதிகாரிகள், சிறுமியின் தாய் பவானியிடம் தொடர்ந்து விசாரணை நடத்தி வருகின்றனர்.

இதையும் படிங்க: 7 வயது சிறுமி மாயமான வழக்கில் தீடீர் திருப்பம்! கண்ணீருடன் கதறும் தாய்... ஜோதிடர் சொன்ன அதிர்ச்சி தகவல்...!!!

சம்பவத்துக்கு முந்தைய நாள் இரவு, கடந்த ஆறு ஆண்டுகளாகக் கொண்டாடப்படாத சிறுமியின் பிறந்தநாள் திடீரெனக் கொண்டாடப்பட்டது ஏன், வழக்கமாகத் தாயுடன் தூங்கும் சிறுமி அன்று மட்டும் தனியாகப் படுக்க வைக்கப்பட்டது ஏன் எனப் பல கேள்விகளை அதிகாரிகள் எழுப்பியுள்ளதாகக் கூறப்படுகிறது. மேலும், வீட்டின் வாசற்கதவு திறந்திருந்தது, நள்ளிரவில் சிறுமி அலறியதாகக் கூறப்படும் சத்தம் தாய்க்குக் கேட்காதது உள்ளிட்ட விவரங்களும் விசாரணையில் கவனம் பெற்றுள்ளன.

சாமியாருடனான தொடர்பு குறித்தும் விசாரணை

ஆலம்பூண்டியில் தங்கியிருந்ததாகக் கூறப்படும் சாமியார் சரவணன் திடீரென அங்கிருந்து சென்றது குறித்தும், அவருக்கும் குடும்பத்தினருக்கும் இருந்த தொடர்பு பற்றியும் அதிகாரிகள் விசாரித்து வருகின்றனர். ஆரம்பத்தில் உள்ளூர் காவல்துறையிடம் அளிக்கப்பட்ட தகவல்களுக்கும், தற்போது சிபிசிஐடியிடம் தெரிவிக்கப்பட்ட விவரங்களுக்கும் இடையே முரண்பாடுகள் இருப்பதாகக் கூறப்படுகிறது. இதனால், குடும்பத்துக்கு நெருக்கமானவர்களுக்கும் வழக்கில் ஏதேனும் தொடர்பு உள்ளதா என்ற கோணத்திலும் விசாரணை நடைபெறுகிறது.

சிசிடிவி காட்சிகள், செல்போன் தரவுகள் ஆய்வு

இதற்கிடையே, 20-க்கும் மேற்பட்ட சிபிசிஐடி காவலர்கள் விசாரணைப் பணியில் ஈடுபடுத்தப்பட்டுள்ளனர். செஞ்சி மற்றும் திண்டிவனம் தேசிய நெடுஞ்சாலைகளில் உள்ள கண்காணிப்பு கேமரா காட்சிகள் ஆய்வு செய்யப்பட்டு வருகின்றன. மேலும், 600-க்கும் மேற்பட்ட செல்போன் தொடர்பான தரவுகளையும் அதிகாரிகள் ஆராய்ந்து வருவதாகத் தகவல் வெளியாகியுள்ளது. சிறுமி மாயமானதற்கான காரணத்தையும், அவர் இருக்கும் இடத்தையும் கண்டறிய விசாரணை தொடர்ந்து நடைபெற்று வருகிறது.

இதையும் படிங்க: 7 வயது சிறுமி மாயமான வழக்கில் தீடீர் திருப்பம்! கண்ணீருடன் கதறும் தாய்... ஜோதிடர் சொன்ன அதிர்ச்சி தகவல்...!!!