பரபரப்பான செய்திக்காக இப்படியா பண்றது..? 19 நாட்கள் நீடிக்கும் மரண வலி... நான் இருக்குற டென்ஷன்ல கேமராவை புடுங்கி ஒடச்சிருவேன்! செஞ்சி சிறுமியின் தாயார் ஆக்ரோஷம்.. வைரல் வீடியோ..!!!
செஞ்சி அருகே மாயமான 7 வயது சிறுமி ஹேமலதாவை சிபிசிஐடி போலீசார் தீவிரமாகத் தேடி வரும் நிலையில், செய்தி சேகரிக்கச் சென்ற ஊடகவியலாளர்களிடம் சிறுமியின் தாய் ஆவேசமாகப் பேசிய வீடியோ வைரலாகியுள்ளது.
by
விழுப்புரம் மாவட்டம் செஞ்சி அருகே மாயமான 7 வயது சிறுமி ஹேமலதாவைத் தேடும் பணி தொடர்ந்து நடைபெற்று வருகிறது. வழக்கு சிபிசிஐடி விசாரணைக்கு மாற்றப்பட்டு, பல்வேறு கோணங்களில் போலீசார் விசாரித்து வருகின்றனர். இந்நிலையில், சிறுமியின் தாயிடம் செய்தி சேகரிக்கச் சென்ற ஊடகவியலாளர்களிடம் அவர் ஆவேசமாகப் பேசிய வீடியோ சமூக வலைதளங்களில் பரவி வருகிறது.
பிறந்தநாள் இரவில் மாயமான சிறுமி
ஆலம்பூண்டி கிராமத்தைச் சேர்ந்த ஹேமலதா, கடந்த அக்டோபர் 11-ஆம் தேதி தனது 7-வது பிறந்தநாளைக் கொண்டாடினார். அன்றைய தினம் நள்ளிரவில் வீட்டில் தூங்கிக்கொண்டிருந்த சிறுமி திடீரென மாயமானார். இதையடுத்து உள்ளூர் போலீசார் 10 தனிப்படைகள் அமைத்து தேடுதல் பணியில் ஈடுபட்டனர். ஆனால், நீண்ட நாட்களாகியும் சிறுமி குறித்த தகவல் கிடைக்காததால், பொதுமக்கள் மற்றும் எதிர்க்கட்சிகள் போராட்டத்தில் ஈடுபட்டன. இதன் தொடர்ச்சியாக வழக்கு சிபிசிஐடி விசாரணைக்கு மாற்றப்பட்டது.
இதையும் படிங்க: 7 வயது சிறுமி மாயமான வழக்கில் தீடீர் திருப்பம்! கண்ணீருடன் கதறும் தாய்... ஜோதிடர் சொன்ன அதிர்ச்சி தகவல்...!!!
செல்போன் அழைப்புகள், செங்கல் சூளைகளில் விசாரணை
தற்போது காஞ்சிபுரம் டிஎஸ்பி தலைமையிலான சிபிசிஐடி குழுவினர் விசாரணையைத் தீவிரப்படுத்தியுள்ளனர். சிறுமி மாயமான பகுதியில் உள்ள செல்போன் கோபுரத் தரவுகள் ஆய்வு செய்யப்பட்டு வருகின்றன. சந்தேகத்திற்குரிய 600-க்கும் மேற்பட்ட அழைப்புகள் குறித்தும் விசாரணை நடக்கிறது. அப்பகுதியில் உள்ள செங்கல் சூளைகளிலும் போலீசார் சோதனை மேற்கொண்டு சிறுமியைத் தேடி வருகின்றனர்.
ஊடகவியலாளர்களிடம் ஆவேசம் காட்டிய தாய்
இந்த நிலையில், செய்தி சேகரிக்கச் சென்ற ஊடகவியலாளர்கள் சிறுமியின் தாயிடம் தொடர்ந்து கேள்விகள் எழுப்பியதாகக் கூறப்படுகிறது. மகள் மாயமானதால் ஏற்கெனவே கடும் மன உளைச்சலில் இருந்த அவர், கேமராவைத் தன்னிடம் நீட்டிய செய்தியாளர்களிடம் கோபத்தை வெளிப்படுத்தினார். 'கேமராவைப் புடுங்கி உடைத்துவிடுவேன்' என்று அவர் எச்சரித்த காட்சிகள் தற்போது சமூக வலைதளங்களில் வைரலாகி வருகின்றன.
சிறுமியின் துயரமான நிலை குறித்து செய்தி சேகரிக்கும் போது, குடும்பத்தினரின் மனநிலையையும் தனியுரிமையையும் ஊடகங்கள் மதிக்க வேண்டும் என்று பலரும் கருத்து தெரிவித்து வருகின்றனர். பரபரப்பான செய்திக்காக பாதிக்கப்பட்ட குடும்பத்தினரிடம் தொடர்ந்து கேள்விகள் கேட்டு அவர்களின் மன உளைச்சலை அதிகரிப்பது சரியல்ல என்றும் சமூக வலைதளங்களில் விமர்சனங்கள் எழுந்துள்ளன. சிறுமியை விரைவில் கண்டுபிடிப்பதே இப்போது முக்கியம் என்றும் பலர் வலியுறுத்தி வருகின்றனர்.
