ஜெயலலிதாவின் யுக்தியை கையில் எடுத்த விஜய்! அதே பாணியில் கோட்டையை தக்கவைக்கும் தவெக அமைச்சரவை அரசியல்!!!
தமிழக முதல்வராக பதவியேற்ற விஜய், தனது முதல் அமைச்சரவையில் தென் தமிழகத்திற்கு அதிக முக்கியத்துவம் அளித்திருப்பது அரசியல் வட்டாரத்தில் கவனம் பெற்றுள்ளது.
by
2026 தமிழக சட்டப்பேரவைத் தேர்தல் முடிவுகள் மாநில அரசியலில் புதிய திருப்பத்தை ஏற்படுத்தியுள்ளன. 108 தொகுதிகளில் வெற்றி பெற்ற தமிழக வெற்றிக் கழகம், காங்கிரஸ் மற்றும் இடதுசாரி கட்சிகளின் ஆதரவுடன் ஆட்சியை அமைத்துள்ளது. முதலமைச்சராகப் பொறுப்பேற்றுள்ள விஜய், தனது முதல் அமைச்சரவையிலேயே தென் தமிழகத்திற்கு அதிக முக்கியத்துவம் அளித்திருப்பது அரசியல் வட்டாரத்தில் பேசுபொருளாகியுள்ளது.
தென் மாவட்டங்களில் உள்ள 51 தொகுதிகளில் 25 இடங்களை கைப்பற்றிய தவெக, அப்பகுதியில் வலுவான ஆதரவை உருவாக்கியுள்ளதாகக் கருதப்படுகிறது. அதற்கான பிரதிபலிப்பாகவே அமைச்சரவை அமைப்பிலும் தென் மண்டலத்திற்கு கணிசமான இடம் வழங்கப்பட்டுள்ளதாக அரசியல் பார்வையாளர்கள் கூறுகின்றனர்.
இதையும் படிங்க: திமுக வின் புதிய அரசியல் வியூகம்! ஓபிஎஸ்ஸை வைத்து ஸ்டாலின் போட்ட மாஸ்டர் பிளான்! எடப்பாடிக்கு அடுத்து காத்திருக்கும் பேரதிர்ச்சி..!!!
தென் மாவட்ட எம்.எல்.ஏ-க்களுக்கு முக்கிய பொறுப்புகள்
மதுரை திருப்பரங்குன்றம் தொகுதியில் வெற்றி பெற்ற நிர்மல்குமார், காரைக்குடியில் சீமானை தோற்கடித்த மருத்துவர் டி.கே.பிரபு மற்றும் சிவகாசியில் வெற்றி பெற்ற கீர்த்தனா ஆகியோருக்கு அமைச்சர் பதவிகள் வழங்கப்பட்டுள்ளன.
அதேபோல், சோழவந்தான் தொகுதி எம்.எல்.ஏ கருப்பையாவுக்கு தற்காலிக சபாநாயகர் பொறுப்பும் வழங்கப்பட்டுள்ளது. இதன் மூலம் சட்டப்பேரவை நிர்வாகத்திலும் தென் மாவட்டங்களுக்கு உரிய பிரதிநிதித்துவம் வழங்கப்பட்டுள்ளது.
தென் தமிழகத்தை பலப்படுத்தும் விஜய்
இந்த நடவடிக்கையை, தென் தமிழக வாக்காளர்கள் தவெக மீது வைத்த நம்பிக்கைக்கு விஜய் அளித்த பதிலாக அரசியல் வட்டாரங்கள் பார்க்கின்றன. குறிப்பாக மதுரை, சிவகங்கை, விருதுநகர் உள்ளிட்ட மாவட்டங்களில் திமுக அமைச்சர்களையே தோற்கடித்து தவெக பெற்ற வெற்றி, கட்சியின் வாக்கு வங்கியை உறுதிப்படுத்தியுள்ளதாக மதிப்பிடப்படுகிறது.
முன்னாள் முதல்வர் ஜெயலலிதா தென் மாவட்டங்களை தனது அரசியல் கோட்டையாக மாற்றியதைப் போலவே, தற்போது விஜய்யும் அதே அரசியல் உத்தியை முன்னெடுத்து வருவதாக கூறப்படுகிறது.
அமைச்சரவை விரிவாக்கத்தில் மேலும் வாய்ப்பு?
தற்போதைய அமைச்சரவையில் இடம்பெற்றுள்ள ஒன்பது பேரில் மூவர் தென் தமிழகத்தைச் சேர்ந்தவர்கள் என்பது கவனிக்கத்தக்க அம்சமாக உள்ளது. வரவிருக்கும் அமைச்சரவை விரிவாக்கத்திலும் மதுரை மத்திய மற்றும் கிழக்கு தொகுதிகளில் வெற்றி பெற்றவர்களுக்கு வாய்ப்பு வழங்கப்படலாம் என்ற தகவல்கள் வெளியாகியுள்ளன.
இதன் மூலம் விஜய் தலைமையிலான தமிழக வெற்றிக் கழகம், தென் தமிழகத்தை தனது அரசியல் மையமாக மாற்றும் நீண்டகால திட்டத்தில் செயல்பட்டு வருவதாக அரசியல் ஆய்வாளர்கள் கருதுகின்றனர்.
