துணை சபாநாயகர் விவகாரத்தில் அடுத்து வெளியான டாஸ்மாக் வீடியோ! அடுத்தடுத்து சிக்கலில் சிக்கும் தவெக ஆட்சி.... புதிய சர்ச்சையால் பரபரப்பு..!!!
துறையூர் தவெக எம்.எல்.ஏவும் துணை சபாநாயகருமான ரவிசங்கர் மீது கார்த்திக் குமார் தாக்குதல் புகார் தெரிவித்த நிலையில், அடுத்தடுத்து வெளியாகும் வீடியோக்களால் சர்ச்சை நீடிக்கிறது.
by
தவெக ஆட்சி அமைந்து ஆறு மாதங்களே ஆன நிலையில், துணை சபாநாயகர் ரவிசங்கர் மீதான தாக்குதல் புகார் அரசியல் பரபரப்பை ஏற்படுத்தியுள்ளது. திருச்சி மாவட்டம் துறையூர் தொகுதியைச் சேர்ந்த கார்த்திக் குமார், அடிப்படை வசதிகள் தொடர்பாக முறையிடச் சென்றபோது தாக்கப்பட்டதாகக் குற்றம் சாட்டியுள்ளார். இந்த விவகாரத்தில் அடுத்தடுத்து வெளியாகும் வீடியோக்கள் சர்ச்சையை மேலும் அதிகரித்துள்ளன.
அடிப்படை வசதிகள் குறித்து முறையிடச் சென்ற கார்த்திக்
திருச்சி மாவட்டம் துறையூர் தொகுதி எம்.எல்.ஏவும், சட்டப்பேரவை துணை சபாநாயகருமான ரவிசங்கர் மீது கண்ணபிரான் காலனியைச் சேர்ந்த கார்த்திக் குமார் புகார் தெரிவித்துள்ளார். தனது பகுதியில் குடிநீர் மற்றும் குப்பை தொடர்பான பிரச்சனைகளைத் தீர்க்கக் கோரி பலமுறை மனு அளித்தும் நடவடிக்கை எடுக்கப்படவில்லை எனக் கூறப்படுகிறது.
இதனால், தீபாவளி நாளன்று மணச்சநல்லூருக்கு வந்த ரவிசங்கரிடம் கார்த்திக் முறையிட முயன்றுள்ளார். அப்போது அவரை ரவிசங்கர் தகாத வார்த்தைகளால் திட்டித் தாக்கியதாகக் கூறப்படும் வீடியோ சமூக வலைதளங்களில் வெளியானது. இந்தக் காட்சிகள் வேகமாகப் பரவிய நிலையில், சில மணி நேரங்களிலேயே மற்றொரு வீடியோ வெளியானது.
மிரட்டி வீடியோ எடுத்ததாக கார்த்திக் குற்றச்சாட்டு
அந்த வீடியோவில் ரவிசங்கருக்கு அருகில் அமர்ந்திருந்த கார்த்திக், இருவருக்கும் இடையே எந்தப் பிரச்சனையும் இல்லை எனக் கூறியிருந்தார். இதனால், உண்மையில் என்ன நடந்தது என்ற குழப்பம் ஏற்பட்டது.
ஆனால், பின்னர் கார்த்திக் வெளியிட்ட மற்றொரு வீடியோவில், தனது உயிருக்கு ஆபத்து இருப்பதாகத் தெரிவித்தார். காவல்துறையினரும் துணை சபாநாயகரும் தன்னை மிரட்டி வீட்டுக்கு அழைத்துச் சென்று, வலுக்கட்டாயமாக மறுப்பு வீடியோவைப் பதிவு செய்ததாக அவர் குற்றம் சாட்டினார். மேலும், ரவிசங்கர் மீது கடும் நடவடிக்கை எடுக்க வேண்டும் என்றும் கோரிக்கை விடுத்தார்.
டாஸ்மாக் வீடியோவால் மீண்டும் சர்ச்சை
இதற்கிடையே, கார்த்திக் டாஸ்மாக் கடையில் மது அருந்திவிட்டு வெளியேறும் காட்சிகள் தற்போது இணையத்தில் வெளியாகியுள்ளன. அவர் மதுபோதையில் வந்துதான் ரவிசங்கரிடம் தகராறில் ஈடுபட்டதாக துணை சபாநாயகரின் ஆதரவாளர்கள் வாதிட்டு வருகின்றனர். இதற்கு மாறாக, கார்த்திக் முன்வைத்த மிரட்டல் குற்றச்சாட்டும் தொடர்ந்து விவாதிக்கப்பட்டு வருகிறது.
ரவிசங்கர் தன் மீதான குற்றச்சாட்டுகளை மறுத்து வரும் நிலையில், தவெக சார்பில் சிறப்பு விசாரணைக் குழு அமைக்கப்பட்டு விசாரணை நடைபெற்று வருவதாகத் தெரிவிக்கப்பட்டுள்ளது. பல்வேறு அரசியல் கட்சிகளும் இந்த விவகாரத்தில் கண்டனம் தெரிவித்துள்ளன. அடுத்தடுத்து வெளியாகும் வீடியோக்களால் துறையூர் மட்டுமின்றி தமிழக அரசியல் வட்டாரத்திலும் இந்த விவகாரம் தொடர்ந்து பேசுபொருளாக உள்ளது.
இதையும் படிங்க: எம். எல். ஏக்களுக்கு அவசர மீட்டிங்..! ஆக்ரோஷத்தில் முதல்வர் விஜய்... பனையூரில் வெடிக்கப் போகும் வெடிகுண்டு! பரபரக்கும் தலைமை செயலகம்..!!,
