காலி இடத்தில் அழுகிய நிலையில் மெத்தையில் சுற்றப்பட்டு கிடந்த பெண்ணின் சடலம்! விசாரணையில் வெளிவந்த அதிர்ச்சி பின்னணி...! கொலைக்காரன் சிக்கிய அந்த ஒரு தடயம்... பெங்களூருவை உலுக்கிய பகீர் சம்பவம்..!!!
பெங்களூருவில் அழுகிய நிலையில் பெண் சடலம் மீட்கப்பட்ட வழக்கில் கணவர் கைது செய்யப்பட்டார். ஆடையில் இருந்த குறிச்சொல் மூலம் போலீசார் துப்பு துலக்கியுள்ளனர்.
by
பெங்களூரு எம்.எஸ். நகரில் உள்ள அக்ரஹாரா லேஅவுட்டில் காலி இடத்தில் அழுகிய நிலையில் பெண் சடலம் மீட்கப்பட்ட வழக்கில், அவரது கணவர் கைது செய்யப்பட்டுள்ளார். நிதிப் பிரச்சினை தொடர்பான தகராறில் மனைவியை கொலை செய்ததாக 32 வயதான சாகர் சந்திர ராவத் மீது குற்றச்சாட்டு எழுந்துள்ளது. சடலத்தை அடையாளம் காண முடியாமல் போலீசார் திணறிய நிலையில், பெண் அணிந்திருந்த ஆடையில் இருந்த ஒரு குறிச்சொல் முக்கிய தடயமாக அமைந்தது.
வீட்டில் ஏற்பட்ட தகராறில் மனைவி கொலை
ஒடிசாவைச் சேர்ந்த 28 வயதான அனுசுயா பெஹரா, தனது கணவர் சாகர் சந்திர ராவத்துடன் பெங்களூருவில் வாடகை வீட்டில் வசித்து வந்தார். கடந்த ஆகஸ்ட் 11ஆம் தேதி இருவருக்கும் நிதிப் பிரச்சினை தொடர்பாக தகராறு ஏற்பட்டதாக கூறப்படுகிறது. அப்போது சாகர், அனுசுயாவை நெரித்துக் கொலை செய்ததாக காவல்துறை விசாரணையில் தெரியவந்துள்ளது.
கொலைக்குப் பிறகு சடலத்தை என்ன செய்வது என தெரியாமல் சாகர் அதை சுமார் மூன்று நாட்கள் வீட்டிலேயே வைத்திருந்ததாக கூறப்படுகிறது. பின்னர் ஆகஸ்ட் 16ஆம் தேதி அதிகாலை, மெத்தையில் சுற்றி கயிற்றால் கட்டிய நிலையில், புதர்கள் நிறைந்த காலி இடத்தில் சடலத்தை வீசிவிட்டு அங்கிருந்து சென்றுள்ளார். அதன்பின் தான் வேலை பார்த்து வந்த ஹோட்டலிலேயே தங்கியிருந்ததாக போலீசார் தெரிவித்துள்ளனர்.
மெத்தையில் சுற்றப்பட்ட நிலையில் சடலம்
காலி இடத்தின் உரிமையாளர் அளித்த தகவலின் பேரில் அங்கு சென்ற சம்பிகேஹள்ளி காவல்துறையினர், மெத்தையில் சுற்றப்பட்டு கயிற்றால் கட்டப்பட்டிருந்த சடலத்தை மீட்டனர். உடல் முற்றிலும் அழுகிய நிலையில் இருந்ததால், உயிரிழந்தவர் யார் என்பதை உடனடியாக கண்டறிய முடியவில்லை.
இதையடுத்து சுற்றுவட்டாரத்தில் உள்ள விடுதிகள் மற்றும் ஹோட்டல்களில் போலீசார் விசாரணை நடத்தினர். ஆரம்ப கட்டத்தில் எந்தத் தடயமும் கிடைக்காத நிலையில், சடலத்தில் இருந்த ஆடைகள், கழுத்தில் அணிந்திருந்த டாலர் மற்றும் வளையல்கள் உள்ளிட்டவற்றை புகைப்படம் எடுத்து விசாரணையை தீவிரப்படுத்தினர்.
ஆடையின் குறிச்சொல் மூலம் கிடைத்த முக்கிய தடயம்
விசாரணையின் போது பெண் அணிந்திருந்த ஆடையில் இருந்த ஒரு குறிச்சொல் போலீசாரின் கவனத்தை ஈர்த்தது. அதை அடிப்படையாகக் கொண்டு நடத்தப்பட்ட ஆய்வில், அந்த ஆடை ஒடிசா மாநிலம் புவனேஸ்வரில் உள்ள ஒரு வணிக வளாகத்தில் விற்பனை செய்யப்பட்டிருந்தது தெரியவந்தது.
அங்கிருந்து பெறப்பட்ட விற்பனை விவரங்களை ஆய்வு செய்த போலீசார், சடலம் அனுசுயா பெஹராவுடையது என்பதை உறுதி செய்தனர். தொடர்ந்து தலைமறைவாக இருந்த அவரது கணவர் சாகர் சந்திர ராவத்தை கைது செய்தனர். ஆடையின் குறிச்சொல் மூலம் கிடைத்த இந்தத் தடயம், அடையாளம் தெரியாமல் இருந்த பெண்ணின் விவரங்களை கண்டறிய போலீசாருக்கு உதவியது.
இதுதொடர்பாக சம்பிகேஹள்ளி காவல்துறையினர் பாரதிய நியாய சன்ஹிதா சட்டத்தின் பிரிவு 103(1)-ன் கீழ் வழக்குப்பதிவு செய்து, கொலைக்கான காரணம் மற்றும் சம்பவத்தின் பின்னணி குறித்து தொடர்ந்து விசாரணை நடத்தி வருகின்றனர். கணவர் கைது செய்யப்பட்டுள்ள நிலையில், வழக்கில் தொடர்புடைய பிற அம்சங்களையும் போலீசார் ஆய்வு செய்து வருகின்றனர்.
