15 வயதில் காணாமல் போன சிறுமி! 500 நாட்களுக்கு பின்... ஆன்லைன் விளையாட்டு மூலம் ரகசியமாக உதவி கேட்டு சிறுமி மீட்பு! பகீர் சம்பவம்...!!!
அமெரிக்காவில் 500 நாட்களுக்கும் மேலாகக் காணாமல் போன சிறுமி, Among Us ஆன்லைன் விளையாட்டு மூலம் ரகசியமாக உதவி கேட்டு மீட்கப்பட்டார். கடத்தல் குற்றச்சாட்டில் 39 வயது நபர் கைது செய்யப்பட்டார்.
by
அமெரிக்காவில் 500 நாட்களுக்கும் மேலாகக் காணாமல் போயிருந்த 17 வயது சிறுமி, ஆன்லைன் விளையாட்டான ‘Among Us’ மூலம் உதவி கேட்டு மீட்கப்பட்டுள்ளார். உட்டா மாகாணத்தைச் சேர்ந்த சிறுமி, ஒரிகன் மாகாணத்தில் உள்ள ஒரு வீட்டின் அடித்தளத்தில் அடைத்து வைக்கப்பட்டிருந்ததாக விசாரணையில் தெரியவந்துள்ளது. சிறுமியைக் கடத்தியதாகக் கூறப்படும் 39 வயது நபரை போலீசார் கைது செய்துள்ளனர்.
சமூக வலைதளம் மூலம் சிறுமியுடன் பழகிய நபர்
கெய்லி அரெல்லானோ என்ற அந்தச் சிறுமி, 2025 மே மாதம் தனது 15 வயதில் காணாமல் போனார். குடும்பத்தினரும் போலீசாரும் பல மாதங்களாகத் தேடியும் அவரைப் பற்றிய தகவல் கிடைக்கவில்லை. நீதித்துறை ஆவணங்களின்படி, ஆடம் ஹண்டர் ஹார்மெல் என்ற 39 வயது நபர் சமூக வலைதளங்கள் மூலம் சிறுமியுடன் பழகியுள்ளார். பணம் தருவதாகக் கூறி அவரை வேறு மாநிலத்துக்கு வரவழைத்த பின்னர், சிறுமியின் செல்போனை ஆற்றில் வீசியுள்ளார். தொடர்ந்து ஒரிகனில் உள்ள தனது வீட்டுக்கு அழைத்துச் சென்று அடித்தளத்தில் அடைத்து வைத்ததாகக் குற்றம் சாட்டப்பட்டுள்ளது.
சிறுமி தப்பிச் செல்ல முயன்றால் கடுமையான விளைவுகளைச் சந்திக்க நேரிடும் என்றும் அந்த நபர் மிரட்டியதாக நீதிமன்ற ஆவணங்களில் குறிப்பிடப்பட்டுள்ளது. சிறுமியின் சொந்த செல்போனைப் பறித்துக்கொண்ட அவர், இணைய வசதி இல்லாத மற்றொரு போனை வைஃபை மூலம் பயன்படுத்த அனுமதித்துள்ளார்.
Among Us விளையாட்டு மூலம் ரகசியமாக உதவி கேட்ட சிறுமி
கிடைத்த சிறிய வாய்ப்பைப் பயன்படுத்திய கெய்லி, ‘Among Us’ ஆன்லைன் விளையாட்டை விளையாடத் தொடங்கினார். கடந்த அக்டோபர் மாத நடுப்பகுதியில், விளையாட்டில் அறிமுகமான மற்றொரு சிறுமியிடம் தனது நிலைமையை ரகசியமாகத் தெரிவித்தார். தான் கடத்தப்பட்டு அடைத்து வைக்கப்பட்டிருப்பதாகக் கூறி உதவியும் கேட்டுள்ளார்.
இதைக் கேட்டு அதிர்ச்சியடைந்த அந்தச் சிறுமி, உடனடியாகத் தனது தாயிடம் தகவல் தெரிவித்தார். அவர் தாமதிக்காமல் எஃப்.பி.ஐ. அதிகாரிகளுக்குத் தகவல் கொடுத்தார். இதையடுத்து அதிகாரிகள் காணொளி அழைப்பு மூலம் கெய்லியின் நிலையை உறுதிப்படுத்தி, ஒரிகன் மாகாண போலீசாருடன் இணைந்து மீட்பு நடவடிக்கையில் இறங்கினர்.
நவம்பர் 1-ல் மீட்பு; 39 வயது நபர் கைது
நவம்பர் 1ஆம் தேதி, ஒரிகன் மாகாணத்தின் ஹண்டிங்டன் பகுதியில் உள்ள வீட்டிலிருந்து கெய்லி பத்திரமாக மீட்கப்பட்டார். பின்னர் அவர் மருத்துவப் பரிசோதனை மற்றும் சிகிச்சைக்காக அழைத்துச் செல்லப்பட்டார். அங்கிருந்து தப்பியோட முயன்ற ஆடம் ஹண்டர் ஹார்மெல் கைது செய்யப்பட்டார். சிறுமியைக் கடத்தியதாக அவர் மீது கூட்டாட்சி குற்றச்சாட்டுகள் பதிவு செய்யப்பட்டுள்ளன.
இந்த மீட்பு நடவடிக்கை குறித்து கருத்து தெரிவித்த எஃப்.பி.ஐ. இயக்குநர் காஷ் படேல், இணையம் வழியாகக் குழந்தைகளைக் குறிவைக்கும் நபர்கள் மீது கடுமையான நடவடிக்கை தொடரும் என்று எச்சரித்துள்ளார். ஆன்லைன் விளையாட்டின் மூலம் சிறுமி உதவி கேட்டுத் தப்பியிருப்பது கவனம் பெற்றுள்ள நிலையில், சமூக வலைதளங்களில் அறிமுகமாகும் நபர்களிடம் குழந்தைகள் எச்சரிக்கையாக இருக்க வேண்டியதன் அவசியமும் மீண்டும் வலியுறுத்தப்பட்டுள்ளது.
இதையும் படிங்க: இறந்தவர்களின் சாம்பலில் சூப் செய்து குடும்பமாக குடிக்கும் விசித்திர பழங்குடியினர்..! பின்னணியில் இருக்கும் அதிரவைக்கும் காரணம்..!!!
