உஷார்... ஆபத்தில் ஸ்மார்ட் டிவிக்கள்.. தப்பிப்பது எப்படி?

ஸ்மார்ட் டிவிகள் ஹேக்கிங் ஆபத்தில் சிக்குமா? எச்சரிக்கை அறிகுறிகள் என்ன? வைரஸ் தாக்குதல் சிக்னல்கள் குறித்து முக்கிய டிப்ஸ்களை அறிந்து கொள்ளுங்கள்.

ஸ்மார்ட் டிவிக்கள்:

இணைய இணைப்பின் மூலம் பொழுதுபோக்கை வழங்கும் ஸ்மார்ட் டிவிகள் இன்று வீடுகளின் அத்தியாவசிய சாதனங்களாக மாறிவிட்டன. கேபிள் மற்றும் டிடிஎச் இணைப்புகளை மாற்றி, ஓடிடி தளங்கள் மற்றும் ஆன்லைன் ஸ்ட்ரீமிங் சேவைகள் வழியாக திரைப்படங்கள், தொடர்கள், நிகழ்ச்சிகள் அனைத்தையும் நேரடியாக பார்க்கும் வசதி கிடைத்துள்ளது. ஆனால், லேப்டாப் மற்றும் ஸ்மார்ட்போன்களைப் போலவே ஸ்மார்ட் டிவிகளும் ஹேக்கிங் அச்சுறுத்தலுக்கு உள்ளாகும் அபாயம் அதிகரித்துள்ளது. இணையத்துடன் எப்போதும் இணைந்திருப்பதாலும், கேமரா, மைக்ரோஃபோன், புளூடூத் போன்ற அம்சங்கள் உள்ளதாலும், டிவிகள் சைபர் குற்றவாளிகளின் இலக்காக மாற வாய்ப்பு உள்ளது.

இதையும் படிங்க: முதல் சிக்னல் கொடுப்பது விரல்களின் நகம்தான்! இப்படியெல்லாம் இருந்தால் உங்கள் கல்லீரல் பாதிக்கப்பட்டுள்ளது என்று அர்த்தம்!

இந்த அறிகுறிகள் இருக்கா?

ஸ்மார்ட் டிவியில் சில எச்சரிக்கை அறிகுறிகள் தென்பட்டால் கவனமாக இருக்க வேண்டும். திடீரென டிவியின் செயல்திறன் குறைதல், அடிக்கடி ஹேங் ஆகுதல், தெரியாத பாப்-அப் அறிவிப்புகள் தோன்றுதல் போன்றவை தீம்பொருள் (Malware) தாக்குதலுக்கான அறிகுறிகளாக இருக்கலாம். இணைய வேகம் சரியாக இருந்தாலும், டிவி மந்தமாக இயங்கினால் அல்லது திடீரென செயலிழந்தால், அது சாதாரண கோளாறு அல்லாமல் பாதுகாப்பு பிரச்சனையாக இருக்கக்கூடும்.

ஆப்களை கண்காணிக்க வேண்டும்:

மேலும், பயனர் பதிவிறக்கம் செய்யாத அறிமுகமற்ற ஆப்ஸ் தானாக தோன்றுதல், முகப்புத் திரையில் விசித்திரமான பெயர்கள் காணப்படுதல் அல்லது ஆப்ஸ் ஐகான்களில் மாற்றம் ஏற்படுதல் போன்றவை ஹேக்கிங் சாத்தியத்தை காட்டும் முக்கிய சிக்னல்களாகும். அதேபோல், டிவி அடிக்கடி தானாக ஆன் மற்றும் ஆஃப் ஆகுதல், மென்பொருள் புதுப்பிப்புகள் இருந்தும் செயல்திறன் குறைதல் போன்றவை வைரஸ் தாக்குதலைக் குறிக்கக்கூடும். இத்தகைய சூழலில் உடனடியாக பாதுகாப்பு நடவடிக்கைகள் எடுக்கப்பட வேண்டும்.

செய்யவேண்டியது என்ன?

பாதுகாப்பாக இருக்க, அதிகாரப்பூர்வ ஆப் ஸ்டோரிலிருந்து மட்டுமே பயன்பாடுகளை பதிவிறக்கம் செய்ய வேண்டும். டிவியின் செட்டிங்ஸில் உள்ள பாதுகாப்பு மற்றும் தனியுரிமை அம்சங்களை இயக்கி வைத்திருக்க வேண்டும். மென்பொருள் புதுப்பிப்புகளை தவறாமல் நிறுவுவது அவசியம். மேலும், வைரஸ் தடுப்பு செயலி கிடைத்தால் அதன்மூலம் டிவியை காலகாலமாக ஸ்கேன் செய்வதும் பாதுகாப்பை அதிகரிக்கும். இணையத்துடன் இணைந்த எந்த சாதனமாக இருந்தாலும், சைபர் பாதுகாப்பு விழிப்புணர்வு மிக முக்கியம்.

இதையும் படிங்க: தேனீ, குளவி கொட்டினால் என்ன செய்ய வேண்டும்? கட்டாயம் தெரிஞ்சிக்கோங்க.!