இன்று மாலை 6:15 மணிக்கு.... வானில் தோன்றும் அபூர்வ தருணம்! கண்ணுக்கு முன்னால் தெரியப்போகும் 6 கிரகங்கள்! எப்போது, எங்கு பார்க்கலாம்? மிஸ் பண்ணிட்டாதீங்க....

விண்வெளி ஆர்வலர்களுக்காக இன்று மாலை வானில் அரிய காட்சி காத்திருக்கிறது. ஒரே நேரத்தில் ஆறு கோள்கள் வரிசையாகத் தோன்றும் கோள்களின் அணிவகுப்பு நிகழ்வு, தமிழகத்தின் பல பகுதிகளில் தெளிவாகக் காணப்படும் அபூர்வ வாய்ப்பாக அமைந்துள்ளது.

இன்று வானில் 6 கோள்கள் அணிவகுப்பு

நமது சூரிய குடும்பத்தில் உள்ள கோள்கள் அனைத்தும் சூரியனை வெவ்வேறு சுற்றுவட்டப் பாதைகளில் சுற்றுகின்றன. அவை தனித்தனியாகச் சுழன்றாலும், பூமியில் இருந்து பார்க்கும்போது ஒரே நேர்க்கோட்டில் அல்லது வளைவான பாதையில் வரிசையாகத் தோன்றுவது இயல்பான வானியல் நிகழ்வு. இதையே வானியலாளர்கள் Planetary Parade என அழைக்கின்றனர்.

இன்று பிப்ரவரி 28 சனிக்கிழமை மாலை, புதன், வெள்ளி, சனி, வியாழன், யுரேனஸ் மற்றும் நெப்டியூன் ஆகிய ஆறு கோள்கள் வானில் அணிவகுத்து காணப்படும். 3 அல்லது 4 கோள்கள் ஒரே நேரத்தில் தோன்றுவது சாதாரணமானதாயினும், 6 கோள்கள் மாலை நேரத்தில் வரிசையாகக் காணப்படுவது மிகவும் அரிதான நிகழ்வாகக் கருதப்படுகிறது.

இதையும் படிங்க: Solar Eclipse: 7 நிமிடங்கள் 31 வினாடிகள்.. இருளில் தவிக்கப்போகும் பூமி..! 

எப்போது, எங்கு பார்க்கலாம்?

சூரிய அஸ்தமனத்திற்குப் பிறகு சுமார் 30 முதல் 45 நிமிடங்கள் வரை — அதாவது மாலை 6:15 மணி முதல் இரவு 8:00 மணி வரை — இந்த காட்சியைப் பார்க்க சிறந்த நேரமாகும். தமிழகத்தின் அனைத்து பகுதிகளிலும் இதைக் காணலாம். குறிப்பாக ஒளி மாசு குறைந்த மலைப்பகுதிகள் மற்றும் கடலோரப் பகுதிகளில் வானம் தெளிவாக இருந்தால் காட்சி மேலும் தெளிவாக இருக்கும்.

எந்த கோள்களை வெறும் கண்களால் காணலாம்?

இந்த அணிவகுப்பில் உள்ள 6 கோள்களில் வெள்ளி, வியாழன், சனி மற்றும் புதன் ஆகிய நான்கு கோள்களை வெறும் கண்களாலேயே பார்க்க முடியும். இவற்றில் வெள்ளி கோள் மிகவும் பிரகாசமாகத் தோன்றும் என்பதால் அதை எளிதில் அடையாளம் காணலாம். ஆனால் யுரேனஸ் மற்றும் நெப்டியூன் ஆகியவை பூமியிலிருந்து அதிக தூரத்தில் இருப்பதால் அவற்றைக் காண தொலைநோக்கி அல்லது பைனாகுலர் போன்ற கருவிகள் தேவைப்படும்.

விண்வெளியில் கோள்கள் உண்மையில் ஒரே நேர்க்கோட்டில் அமைந்திருக்காது; பூமியின் பார்வைக் கோணத்தால் அவை வரிசையாகத் தோன்றுகின்றன. இருப்பினும், இந்த அபூர்வமான வானியல் தருணம் விண்வெளி ஆர்வலர்களுக்கும் பொதுமக்களுக்கும் மறக்கமுடியாத அனுபவமாக இருக்கும். ஆகவே இன்று மாலை மேற்குத் திசை வானத்தை நோக்கிப் பார்த்து, இந்த அபூர்வ விண்வெளி நிகழ்வு காட்சியைத் தவறவிடாமல் கண்டு மகிழுங்கள்.