முதல் மனைவி ஓடி போனதாக கணவன் நம்பவைத்த நாடகம்! 2-வது மனைவியுடன் ஜாலியாக வாழ்ந்த வாழ்க்கை..! கொழுந்தியாவுக்கு வந்த அந்த ஒரு சந்தேகத்தால்... விசாரணையில் தெரிந்த அடுக்கடுக்கான உண்மைகள்..!!!
திருநெல்வேலி அருகே முதல் மனைவியை கல்குவாரி குட்டையில் தள்ளி கொலை செய்ததாக கணவர் மகாராஜா கைது செய்யப்பட்டார். எலும்புகள் மீட்கப்பட்டன.
by
திருநெல்வேலி மாவட்டம் சுத்தமல்லி அருகே முதல் மனைவியை கொலை செய்து, அவர் வேறு ஒருவருடன் சென்றுவிட்டதாக நாடகமாடியதாக கணவர் மகாராஜா கைது செய்யப்பட்டுள்ளார். கடந்த ஆண்டு நடந்ததாக கூறப்படும் கொலை தொடர்பான விசாரணையில், பழைய கல்குவாரி குட்டையில் இருந்து எலும்புகள் மற்றும் சேலை உள்ளிட்ட தடயங்களை போலீசார் மீட்டுள்ளனர்.
இரண்டாவது திருமணத்தால் ஏற்பட்ட குடும்பத் தகராறு
சுத்தமல்லி அடுத்த கொண்டா நகரைச் சேர்ந்த மகாராஜா (38), சிப்காட் தொழிலாளியாக பணியாற்றி வந்தார். கடந்த 2008-ம் ஆண்டு கடலூர் மாவட்டம் பண்ருட்டியைச் சேர்ந்த அமராவதி (34) என்பவரை காதலித்து திருமணம் செய்துகொண்டார். இவர்களுக்கு இரண்டு மகன்கள் உள்ளனர். இந்த நிலையில், 2024-ம் ஆண்டு தனது அத்தை மகளை மகாராஜா இரண்டாவதாக திருமணம் செய்ததாக கூறப்படுகிறது. இதனால் அமராவதிக்கும் மகாராஜாவுக்கும் அடிக்கடி தகராறு ஏற்பட்டுள்ளது.
இதையும் படிங்க: அரசு வழங்கும் மாதாந்திர உதவித்தொகையை அடுத்த மாதம் பெற... உடனே இதை போய் செய்யுங்க! இல்லையெனில் இனி வங்கி கணக்கில் பணம் கிடையாது...!!
கல்குவாரி குட்டைக்கு அழைத்துச் சென்று கொலை
கடந்த ஆண்டு மே மாதம் குடும்பத் தகராறு முற்றிய நிலையில், அமராவதியை மகாராஜா மோட்டார் சைக்கிளில் பாப்பான்குளம் பகுதியில் உள்ள பழைய கல்குவாரி குட்டைக்கு அழைத்துச் சென்றதாக போலீஸ் விசாரணையில் தெரியவந்துள்ளது. அங்கு இருவருக்கும் மீண்டும் வாக்குவாதம் ஏற்பட்டுள்ளது. அப்போது அமராவதியை கன்னத்தில் தாக்கியதில் அவர் மயங்கி விழுந்ததாகவும், பின்னர் அவரை கல்குவாரி குட்டையில் தள்ளி கொலை செய்ததாகவும் கூறப்படுகிறது.
இதையடுத்து எதுவும் நடக்காதது போல மகாராஜா உறவினர்களிடம், அமராவதி வேறு ஒருவருடன் சென்றுவிட்டதாக கூறியதாக போலீசார் தெரிவித்துள்ளனர். பின்னர் இரண்டாவது மனைவியுடன் தொடர்ந்து குடும்பம் நடத்தி வந்துள்ளார்.
தங்கையின் புகாரால் வெளிச்சத்துக்கு வந்த உண்மை
சுமார் ஓராண்டாக அக்கா அமராவதியை தொலைபேசியில் தொடர்புகொள்ள முடியாததால் சந்தேகமடைந்த அவரது தங்கை விஜயலட்சுமி, சுத்தமல்லி காவல் நிலையத்தில் புகார் அளித்தார். இதையடுத்து போலீசார் விசாரணையை தீவிரப்படுத்தினர். கிடுக்கிப்பிடி விசாரணையில் மகாராஜா முன்னுக்குப்பின் முரணாக பதிலளித்ததாக கூறப்படுகிறது. தொடர்ந்து நடந்த விசாரணையில், அமராவதியை கொலை செய்ததாக அவர் ஒப்புக்கொண்டதாக போலீசார் தெரிவித்தனர்.
இதையடுத்து மகாராஜாவை போலீசார் பாப்பான்குளம் பழைய கல்குவாரிக்கு அழைத்துச் சென்றனர். அங்கு தேடுதல் நடத்தியபோது அமராவதியின் மண்டை ஓடு மற்றும் எலும்புகள், சேலை உள்ளிட்ட தடயங்கள் மீட்கப்பட்டன. குற்ற உணர்ச்சியால் பல மாதங்களாக சரியாக தூங்கவில்லை என மகாராஜா கூறியதாகவும் போலீசார் தெரிவித்துள்ளனர். இதனைத் தொடர்ந்து அவரை கைது செய்து நீதிமன்றத்தில் ஆஜர்படுத்தி சிறையில் அடைத்தனர்.
