சாலையோரம் பெற்றோருடன் தூங்கிய குழந்தை திடீர் மாயம்! விடிய விடிய தேடுதல் வேட்டை... 35 நாட்களுக்கு பிறகு வெளிவந்த அதிர்ச்சி பின்னணி...!!!

ராணிப்பேட்டை மாவட்டம் லாலாபேட்டை பகுதியில் பெற்றோருடன் சாலையோரத்தில் தூங்கியபோது மாயமான ஒரு வயது குழந்தை மகேஸ்வரி, 35 நாட்களுக்குப் பிறகு ஆந்திர மாநிலத்தில் பத்திரமாக மீட்கப்பட்டுள்ளார். குழந்தையைக் கடத்தியதாக ஆந்திராவைச் சேர்ந்த பெண் உள்ளிட்ட ஐந்து பேரை போலீசார் கைது செய்துள்ளனர். குழந்தை மாயமானது தொடர்பாகத் தொடர்ந்து நடத்தப்பட்ட விசாரணையில் இந்த முன்னேற்றம் ஏற்பட்டுள்ளது.

பெற்றோருடன் தூங்கிய குழந்தை திடீர் மாயம்

லாலாபேட்டையைச் சேர்ந்த சேகர் – பிரேமா தம்பதியினர், பழைய பிளாஸ்டிக் பாட்டில்கள் மற்றும் கழிவுகளைச் சேகரித்து விற்பனை செய்து வாழ்க்கை நடத்தி வருகின்றனர். சொந்தமாக வீடு இல்லாததால் சாலையோரங்களில் தங்கியிருந்த இவர்களுக்கு மகேஸ்வரி என்ற ஒரு வயது பெண் குழந்தை உள்ளது.

இதையும் படிங்க: அரசு பள்ளி ஆசிரியர்கள் சொத்து விவரங்களை பதிவேற்ற.. தமிழக அரசு விடுத்த அதிரடி உத்தரவு..! காலக்கெடுவை தவறினால் அதிரடி நடவடிக்கை...!!!

கடந்த செப்டம்பர் 23-ம் தேதி வானாபாடி பகுதியில் பெற்றோருடன் படுத்திருந்த குழந்தை திடீரென காணாமல் போனது. சுற்றியுள்ள இடங்களில் தேடியும் குழந்தை கிடைக்காததால், பெற்றோர் காவல்துறையிடம் புகார் அளித்தனர். இதையடுத்து போலீசார் தனிப்படை அமைத்து விசாரணையைத் தொடங்கினர்.

கண்காணிப்பு கேமராக்கள் மூலம் கிடைத்த தகவல்

குழந்தையைத் தேடும் பணியில் ஈடுபட்ட போலீசார், சம்பவம் நடந்த பகுதியிலிருந்த கண்காணிப்பு கேமரா பதிவுகள் மற்றும் உள்ளூர் மக்களிடம் கிடைத்த தகவல்களை ஆய்வு செய்தனர். தொடர்ந்து நடத்தப்பட்ட விசாரணையில், குழந்தை ஆந்திர மாநிலத்துக்குக் கடத்தப்பட்டிருப்பது தெரியவந்தது.

இதையடுத்து ஆந்திராவுக்குச் சென்ற தனிப்படை போலீசார், அங்கு குழந்தையை மீட்டு, கடத்தல் வழக்கில் தொடர்புடையதாகக் கூறப்படும் ஆந்திராவைச் சேர்ந்த பெண் உள்ளிட்ட ஐந்து பேரைக் கைது செய்தனர்.

35 நாட்களுக்குப் பிறகு பெற்றோரிடம் ஒப்படைப்பு

சுமார் 35 நாட்களாக நீடித்த தேடுதல் பணிக்குப் பிறகு மகேஸ்வரி பத்திரமாக மீட்கப்பட்டு பெற்றோரிடம் ஒப்படைக்கப்பட்டுள்ளார். நீண்ட நாட்களாகக் குழந்தையைத் தேடி வந்த குடும்பத்தினருக்கு இது நிம்மதியை அளித்துள்ளது.

குழந்தை கடத்தப்பட்டதன் பின்னணியில் பணம் கொடுக்கல் வாங்கல் அல்லது வேறு ஏதேனும் கும்பலுக்குத் தொடர்பு உள்ளதா என்பது குறித்து போலீசார் விசாரித்து வருகின்றனர். கைது செய்யப்பட்ட ஐந்து பேரிடமும் தொடர்ந்து விசாரணை நடத்தப்பட்டு வருகிறது.

இதையும் படிங்க: குஷியோ குஷி..! பள்ளிகளுக்கு தொடர்ந்து 3 நாட்கள் விடுமுறை..! தமிழக அரசின் அதிரடி அறிவிப்பு..!!!