குழந்தையை தானே பணத்துக்காக விற்றுவிட்டேன் என்று பேச்சு...! வேலைக்குக் கூட போக முடியல... மூத்த பொண்ணு காலேஜ் போக இப்போ தான் அனுமதி! செஞ்சி சிறுமி விவகாரத்தில் மனதை உலுக்கும் உண்மைகள்...!!!

விழுப்புரம் மாவட்டம் செஞ்சி அருகே ஆலம்பூண்டி கிராமத்தில் மாயமான 7 வயது சிறுமி குறித்து 22 நாட்களுக்கு மேலாகியும் எந்தத் தகவலும் கிடைக்கவில்லை. வழக்கு சிபிசிஐடி போலீசாருக்கு மாற்றப்பட்டு விசாரணை தொடர்ந்து நடைபெற்று வருகிறது. மகளைப் பிரிந்து தவித்து வரும் தாய் பவானி, தனது குழந்தையைப் பாதுகாப்பாக மீட்டுத் தருமாறு கண்ணீருடன் கோரிக்கை விடுத்துள்ளார்.

வேலைக்குச் செல்ல முடியாமல் தவிக்கும் குடும்பம்

சிறுமி காணாமல் போனது முதல் அவரது குடும்பத்தினர் கடும் மன உளைச்சலில் இருந்து வருகின்றனர். நாட்கள் கடந்தும் குழந்தை குறித்த எந்தத் தகவலும் கிடைக்காததால், குடும்பத்தின் இயல்பு வாழ்க்கையும் பாதிக்கப்பட்டுள்ளது.

இதையும் படிங்க: அம்மாகிட்ட சீக்கிரம் வாம்மா...! என் பிள்ளை நிச்சயம் உயிருடன் திரும்பி வருவாள்..... மகளுக்கு தீபாவளி புத்தாடையோடு நாளுக்கு நாள் காத்திருக்கும் தாய்..!!!

இதுகுறித்து தாய் பவானி கூறுகையில், கூலி வேலைக்குச் சென்றுதான் குடும்பத்தை நடத்தி வருவதாகவும், மகள் காணாமல் போனதிலிருந்து வேலைக்குச் செல்ல முடியாமல் உணவுக்கே சிரமப்படும் நிலை ஏற்பட்டுள்ளதாகவும் வேதனை தெரிவித்துள்ளார். தொடர்ந்து நடைபெறும் விசாரணையாலும் மன அழுத்தம் அதிகரித்துள்ளதாக அவர் கூறியுள்ளார்.

சமூக வலைதள வதந்திகளால் வேதனை: தாய் புகார்

மகள் காணாமல் போன விவகாரத்தில் தங்களைப் பற்றி சமூக வலைதளங்களிலும் சில ஊடகங்களிலும் தவறான தகவல்கள் பரப்பப்படுவதாக பவானி குற்றம்சாட்டியுள்ளார். குழந்தையைத் தானே யாரிடமோ கொடுத்துவிட்டதாகவும், பணத்துக்காக விற்றுவிட்டதாகவும் சிலர் கூறுவது மிகுந்த வேதனையை ஏற்படுத்துவதாகத் தெரிவித்துள்ளார்.

இதன் காரணமாக பல ஊடகங்களுக்கு பேட்டி அளிப்பதையே தவிர்த்து வருவதாகவும் அவர் கூறியுள்ளார். அதே நேரத்தில், தங்களுக்கு ஆதரவாகக் குரல் கொடுக்கும் ஊடகங்களுக்கும் பொதுமக்களுக்கும் நன்றி தெரிவித்துள்ளார்.

சிபிசிஐடி விசாரணை தொடர்கிறது

சிறுமியைக் கண்டுபிடிக்க சிபிசிஐடி போலீசார் தொடர்ந்து முயற்சி செய்து வருவதாக பவானி தெரிவித்துள்ளார். விசாரணையில் உரிய துப்பு கிடைத்தால் குழந்தையை விரைவில் கண்டுபிடிக்க முடியும் என்ற நம்பிக்கையையும் அவர் வெளிப்படுத்தியுள்ளார்.

இதற்கிடையே, கல்லூரிக்குச் செல்லாமல் இருந்த தனது மற்றொரு மகள் தொடர்ந்து படிப்பைத் தொடர வேண்டும் என்பதற்காக, அவரைக் கல்லூரிக்கு அனுப்ப சிபிசிஐடி போலீசார் அனுமதி அளித்ததாகவும் தகவல் வெளியாகியுள்ளது. குடும்பத்தினர் தற்போது வதந்திகளைப் பொருட்படுத்தாமல், மாயமான சிறுமி பாதுகாப்பாக வீடு திரும்ப வேண்டும் என்ற எதிர்பார்ப்புடன் காத்திருக்கின்றனர்.

இதையும் படிங்க: தயவு செய்து தேவையில்லாத பேச்சு பேசாதீங்க..! எங்களுக்கு பணம் வேண்டாம்.. எங்க மகளை மீட்டு கொடுத்தாலே போதும்! கண்ணீர்விட்டு கதறிய செஞ்சி சிறுமியின் தாய்..!!!