அதிர்ச்சி! பள்ளிப் பேருந்து மீது கனரக லாரி நேருக்கு நேர் மோதி விபத்து!!!
கரூர் தரகம்பட்டி அருகே பள்ளி பேருந்து மீது கனரக லாரி நேருக்கு நேர் மோதியதில் 15க்கும் மேற்பட்ட மாணவர்கள் காயமடைந்தனர். 4 பேருக்கு தீவிர சிகிச்சை அளிக்கப்படுகிறது.
by
கரூர் மாவட்டம் தரகம்பட்டி அருகே பள்ளி மாணவர்களை ஏற்றிச் சென்ற பேருந்து மீது கனரக லாரி நேருக்கு நேர் மோதியது. பாலவிடுதி அருகே நடந்த பள்ளி பேருந்து விபத்தில் 15-க்கும் மேற்பட்ட மாணவர்கள் காயமடைந்தனர். இதில் 4 மாணவிகளுக்கு பலத்த காயம் ஏற்பட்டுள்ளது.
கட்டுப்பாட்டை இழந்த லாரி;
தரகம்பட்டி அருகே செயல்பட்டு வரும் தனியார் மெட்ரிக் மேல்நிலைப் பள்ளியின் பேருந்து, மாணவர்களை ஏற்றிக்கொண்டு பாலவிடுதி நோக்கிச் சென்றுகொண்டிருந்தது. அப்போது எதிரே விலங்குத் தீவனங்களை ஏற்றிக்கொண்டு வந்த கனரக லாரி திடீரென ஓட்டுநரின் கட்டுப்பாட்டை இழந்ததாக கூறப்படுகிறது. இதனால் லாரி எதிர்பாராதவிதமாக பள்ளி பேருந்து மீது நேருக்கு நேர் மோதியது.
மோதலின் வேகத்தில் பேருந்தின் முன்பகுதி பலத்த சேதமடைந்தது. பேருந்துக்குள் இருந்த மாணவர்கள் அச்சத்தில் அலறினர். குறிப்பாக ஜன்னல் ஓரங்களில் அமர்ந்திருந்த மாணவிகள் சிலர் படுகாயமடைந்தனர்.
15-க்கும் மேற்பட்ட மாணவர்கள் காயம்
மோதலில் 15-க்கும் மேற்பட்ட மாணவர்களுக்கு காயம் ஏற்பட்டது. அவர்களில் இரு மாணவிகளுக்கு காலில் எலும்பு முறிவு ஏற்பட்டுள்ளது. மேலும் இரு மாணவிகளுக்கு பலத்த காயம் ஏற்பட்டதாக தகவல் வெளியாகியுள்ளது.
தகவல் கிடைத்ததும் பாலவிடுதி காவல் துறையினர் சம்பவ இடத்துக்கு விரைந்து சென்றனர். காயமடைந்த மாணவ-மாணவிகளை மீட்டு, 108 ஆம்புலன்ஸ் மூலம் திருச்சி மாவட்டம் மணப்பாறை அருகே உள்ள தனியார் மருத்துவமனைக்கு அனுப்பி வைத்தனர்.
லாரி ஓட்டுநரிடம் போலீசார் விசாரணை
மருத்துவமனையில் காயமடைந்த மாணவிகளுக்கு தீவிர சிகிச்சைப் பிரிவில் சிகிச்சை அளிக்கப்பட்டு வருகிறது. இதனிடையே, லாரி ஓட்டுநர் காவல் துறையினரால் பிடிக்கப்பட்டுள்ளார்.
விபத்து தொடர்பாக வழக்குப் பதிவு செய்துள்ள பாலவிடுதி போலீசார், லாரி ஓட்டுநர் கட்டுப்பாட்டை இழந்ததற்கான காரணம் குறித்து விசாரணை நடத்தி வருகின்றனர். பள்ளி மாணவர்கள் பயணித்த பேருந்து விபத்தில் சிக்கியதால் அப்பகுதியில் பரபரப்பு ஏற்பட்டுள்ளது.
