நள்ளிரவில் காரில் தூங்கிய 12 வயது சிறுமி! உணவு வாங்க சென்ற பெற்றோர்.. திரும்பி வந்து பார்த்தா காரையும் காணாம்.. பொண்ணையும் காணாம்! இறுதியில் நடந்த ட்விஸ்ட்.. உறைய வைக்கும் உண்மை சம்பவம்!!!
கூடுவாஞ்சேரியில் காரில் தூங்கிக் கொண்டிருந்த 12 வயது சிறுமியுடன் வாகனத்தைத் திருடிச் சென்ற ஓட்டுநர், சீர்காழி அருகே சிறுமி தப்பியதைத் தொடர்ந்து கைது செய்யப்பட்டார். கார் மீட்கப்பட்டது.
செங்கல்பட்டு மாவட்டம் கூடுவாஞ்சேரியில், காரில் தூங்கிக் கொண்டிருந்த 12 வயது சிறுமியுடன் வாகனத்தைத் திருடிச் சென்ற 46 வயது நபர் கைது செய்யப்பட்டுள்ளார். உணவு வாங்குவதற்காக பெற்றோர் காரை நிறுத்திவிட்டு உணவகத்திற்குச் சென்ற நேரத்தில் இந்தச் சம்பவம் நடந்துள்ளது. சீர்காழி அருகே கார் நின்றபோது சிறுமி சாமர்த்தியமாகத் தப்பி, பொதுமக்களின் உதவியுடன் பத்திரமாக மீட்கப்பட்டார்.
சிறுமியுடன் காரைத் திருடிச் சென்ற நபர்
இரவு நேரத்தில் உணவு வாங்குவதற்காக கூடுவாஞ்சேரி பகுதியில் பெற்றோர் காரை நிறுத்தியுள்ளனர். அப்போது 12 வயது மகள் பின் இருக்கையில் தூங்கிக் கொண்டிருந்ததால், அவரது தூக்கம் கலையக்கூடாது என நினைத்து காரின் இன்ஜின் மற்றும் ஏசியை அணைக்காமல் பெற்றோர் உணவகத்திற்குள் சென்றுள்ளனர்.
அந்த நேரத்தில் அங்கு வந்த கடலூரைச் சேர்ந்த ராஜ் மோகன் (46), காரைத் திருடிச் சென்றுள்ளார். காருக்குள் சிறுமி இருப்பதை அவர் கவனிக்கவில்லை. இதற்கிடையே கார் நீண்ட தூரம் சென்ற பிறகு சிறுமி கண்விழித்துள்ளார்.
சீர்காழியில் இறங்கித் தப்பிய சிறுமி
காரை ஓட்டுவது தனது தந்தை இல்லை என்பதை உணர்ந்த சிறுமி அதிர்ச்சியடைந்தார். இருப்பினும், பதற்றப்படாமல் சமயோசிதமாகச் செயல்பட்டுள்ளார். அதிகாலை 4.30 மணியளவில் சீர்காழி பேருந்து நிலையம் அருகே கார் நின்றபோது, அதிலிருந்து கீழே இறங்கித் தப்பியுள்ளார்.
அங்கிருந்த அரசுப் பேருந்து நடத்துநர் மற்றும் பொதுமக்களிடம் நடந்ததைக் கூறி உதவி கேட்டுள்ளார். இதையடுத்து காவல்துறையினருக்குத் தகவல் தெரிவிக்கப்பட்டது. போலீசார் சிறுமியைப் பத்திரமாக மீட்டனர்.
கார் பறிமுதல்; ஓட்டுநர் கைது
இதற்கிடையே, காரைத் திருடிச் சென்ற நபரைப் பிடிக்க போலீசார் விசாரணையைத் தீவிரப்படுத்தினர். கடலூர் அருகே காரைக் கைவிட்டுவிட்டு, பல்லடம் பகுதிக்குப் பேருந்தில் தப்பிச் சென்ற ராஜ் மோகனை கைது செய்தனர். திருடப்பட்ட காரும் பறிமுதல் செய்யப்பட்டது.
முதற்கட்ட விசாரணையில் சிறுமிக்கு எந்தத் தீங்கும் ஏற்படவில்லை என்பது தெரியவந்துள்ளது. ராஜ் மோகனின் பின்னணி மற்றும் இந்தச் சம்பவத்துக்கான காரணம் குறித்து போலீசார் தொடர்ந்து விசாரித்து வருகின்றனர். குழந்தைகள் காருக்குள் தனியாக இருக்கும்போது இதுபோன்ற ஆபத்துகள் ஏற்படலாம் என்பதால், பெற்றோர் வாகனத்தை விட்டு வெளியே செல்லும்போது குழந்தைகளை உடன் அழைத்துச் செல்வது அவசியம்.
இதையும் படிங்க: செஞ்சி சிறுமி மாயம் வழக்கில் ஒருபுறம் சாம்பல் சோதனை... மறுபுறம் DGP அகர்வால் கூறிய முக்கிய விளக்கம்..!!!