ஆடாமல் ஜெயித்த இந்திய அணி.! விளையாடி வெற்றிபெற்ற ஆஸ்திரேலிய அணி.! மகளிர் தினத்தன்று யாருக்கு உலக்கோப்பை..?

2020 மகளிர் டி20 உலகக்கோப்பை தொடரின் அரையிறுதி மழையால் தடைபட்ட நிலையில், இந்திய மகளிர் அணி நேரடியாக இறுதிப் போட்டிக்கு முன்னேறியது. இந்திய அணியை எதிர்த்து ஆஸ்திரேலிய அணி ஆடுகிறது.

பெண்களுக்கான 7-வது 20 ஓவர் உலக கோப்பை கிரிக்கெட் போட்டி ஆஸ்திரேலியாவில் நடைபெற்று வருகிறது. 10 அணிகள் பங்கேற்ற இந்த போட்டியில் லீக் சுற்று முடிவில் ‘ஏ’ பிரிவில் முதல் 2 இடங்களை பிடித்த இந்தியா, ஆஸ்திரேலியா, ‘பி’ பிரிவில் டாப்-2 இடத்தை பெற்ற தென்ஆப்பிரிக்கா, இங்கிலாந்து ஆகிய அணிகள் அரைஇறுதிக்கு தகுதி பெற்றன.

இந்தநிலையில் நேற்று இந்தியா - இங்கிலாந்து அணிகள் மோதவிருந்த அரையிறுதிப் போட்டி மழையால் கடுமையாக பாதிக்கப்பட்டது. அதனால், போட்டி நிறுத்தப்பட்டு 'ஏ' பிரிவில் புள்ளிப்பட்டியலில் முதலிடம் பிடித்த இந்திய அணி இறுதிப்போட்டிக்குத் தகுதி பெற்றதாக அறிவிக்கப்பட்டது.  

இதனையடுத்து மற்றொரு அரையிறுதிப் போட்டியில் தென்னாப்பிரிக்கா - ஆஸ்திரேலியா அணிகள் மோதியது. அந்தப் போட்டியில், தென்னாப்பிரிக்காவை ஆஸ்திரேலியா அணி வீழ்த்தி  இறுதிப்போட்டிக்குள் நுழைந்தது.

இந்தநிலையில் 08.03.2020 ஞாயிற்றுக்கிழமை மெல்போர்னில் நடைபெறவுள்ள உலகக் கோப்பை இறுதிப்போட்டியில் ஆஸ்திரேலிய -இந்திய அணிகள் மோதவுள்ளது. 2020 உலகக் கோப்பை தொடரில் நடந்த முதல் குரூப் சுற்று போட்டியில் ஆஸ்திரேலிய அணியை இந்தியா வீழ்த்தியது என்பது குறிப்பிடத்தக்கது.