திடீர் ட்விஸ்ட்... தவெகவில் விஜயபாஸ்கருக்கு கிடைத்த பதவியால் மோதிக்கொள்ளும் புள்ளிகள்! புதுக்கோட்டையில் கிளம்பிய புதிய கோஷ்டி கணக்கு...!!!

தமிழக வெற்றிக் கழகத்தில் முன்னாள் அமைச்சர் சி. விஜயபாஸ்கருக்கு அமைப்புச் செயலாளர் பதவி வழங்கப்பட்டிருப்பது புதுக்கோட்டை மாவட்ட அரசியலில் புதிய பரபரப்பை ஏற்படுத்தியுள்ளது. அதிமுகவில் முக்கிய தலைவராக வலம் வந்த அவர், விராலிமலை எம்எல்ஏ பதவியை ராஜினாமா செய்துவிட்டு தவெகவில் இணைந்த நிலையில், நீண்ட நாட்களாக எதிர்பார்த்த அங்கீகாரம் தற்போது கிடைத்திருப்பதாக அவரது ஆதரவாளர்கள் உற்சாகம் தெரிவித்துள்ளனர். இதனால் புதுக்கோட்டை தவெகவில் அடுத்தகட்ட அரசியல் நகர்வுகள் மீது கவனம் திரும்பியுள்ளது.

விஜயபாஸ்கருக்கு பதவி... ஆதரவாளர்கள் உற்சாகம்

தவெகவில் இணைந்த பிறகு விஜயபாஸ்கருக்கு உடனடியாக முக்கிய பொறுப்பு வழங்கப்படவில்லை என்ற அதிருப்தி அவரது ஆதரவாளர்கள் மத்தியில் இருந்ததாக கூறப்பட்டது. தற்போது அவருக்கு அமைப்புச் செயலாளர் என்ற உயர்ந்த பொறுப்பு வழங்கப்பட்டுள்ளதால், மாவட்ட அளவில் அவரது அரசியல் செல்வாக்கு கணிசமாக உயரும் என எதிர்பார்க்கப்படுகிறது. இதையடுத்து ஆதரவாளர்கள் பட்டாசு வெடித்தும், போஸ்டர்கள் ஒட்டியும் தங்களது மகிழ்ச்சியை வெளிப்படுத்தி வருகின்றனர்.

இதையும் படிங்க: எஸ்.பி.வேலுமணி, நத்தம் விஸ்வநாதன் பரபரப்பு அறிக்கை! அதிர்ச்சியில் எடப்பாடி..!!!

புதுக்கோட்டையில் உருவாகும் புதிய கோஷ்டி கணக்கு

அதே நேரத்தில், இந்த நியமனம் தவெகவின் உள்கட்சி கோஷ்டி மோதலை வெளிச்சத்துக்கு கொண்டு வந்துள்ளதாக கூறப்படுகிறது. அறந்தாங்கி தொகுதியின் முக்கிய நிர்வாகியான முகமது பர்வேஸ் தரப்பினர், விஜயபாஸ்கரின் வருகையால் தங்களது செல்வாக்கு குறையக்கூடும் என்ற அச்சத்தில் இருந்ததாக தகவல்கள் தெரிவிக்கின்றன. இரு தரப்பும் வெளிப்படையாக இணக்கமாக செயல்பட்டாலும், மாவட்ட அரசியலில் யாருடைய கை ஓங்கும் என்பதில் போட்டி நிலவி வந்ததாக கூறப்படுகிறது.

இப்போது விஜயபாஸ்கருக்கு கட்சிப் பொறுப்பும் கிடைத்துள்ளதால், அவரது ஆதிக்கம் மேலும் அதிகரிக்கலாம் என்ற கணக்கு பர்வேஸ் ஆதரவாளர்களிடையே அதிருப்தியை ஏற்படுத்தியுள்ளதாக தெரிகிறது. இதற்கிடையில், தவெக தொடங்கிய காலம் முதல் கட்சிக்காகவும் விஜய் ரசிகர் மன்றத்துக்காகவும் பணியாற்றிய நிர்வாகிகளில் சிலர், மாற்றுக் கட்சிகளில் இருந்து வருபவர்களுக்கு உடனடியாக முக்கிய பதவிகள் வழங்கப்படுவதாக அதிருப்தி தெரிவித்து வருவதாக கூறப்படுகிறது.

இடைத்தேர்தல் கணக்கு... தலைமைக்கு புதிய சவால்

இதனால் புதுக்கோட்டை தவெகவில் முன்னாள் அதிமுகவினரை மையமாகக் கொண்ட ஒரு தரப்பும், ஆரம்பகால விஜய் ரசிகர் மன்ற நிர்வாகிகளை உள்ளடக்கிய மற்றொரு தரப்பும் என இரு அணிகள் உருவாகி வருவதாக கட்சி வட்டாரங்களில் பேசப்படுகிறது. விஜயபாஸ்கருக்கு பதவி கிடைத்ததைத் தொடர்ந்து நடைபெற்ற ஆதரவாளர் கொண்டாட்டங்கள் இந்தப் பிரிவினையை மேலும் வெளிப்படையாக காட்டியுள்ளன.

வரவிருக்கும் தேர்தல் மற்றும் இடைத்தேர்தல் அரசியலில் வலுவான உள்ளூர் தலைவர்கள் தேவை என்பதாலேயே விஜயபாஸ்கருக்கு முக்கிய பொறுப்பு வழங்கப்பட்டதாக கூறப்படுகிறது. தவெக பொதுச்செயலாளர் புஸ்ஸி ஆனந்தின் ஆலோசனையின் அடிப்படையில் இந்த முடிவு எடுக்கப்பட்டதாகவும் தகவல்கள் வெளியாகியுள்ளன. ஆனால், விஜயபாஸ்கர் நியமனம் தொடர்பாக மாவட்ட அளவில் உருவாகியுள்ள அதிருப்தி கட்சித் தலைமைக்கு புதிய தலைவலியாக மாறியுள்ளது. இதனை சமாளித்து இரு தரப்பினரையும் ஒருங்கிணைக்க புஸ்ஸி ஆனந்த் விரைவில் புதுக்கோட்டையில் நேரடியாக களமிறங்கலாம் என எதிர்பார்க்கப்படுகிறது.

இதையும் படிங்க: திமுக- வின் தீர்மானமான முடிவு இதுதான்... முதல் கட்டத்திலேயே விஜய்க்கு ஆப்பு.! தமிழக அரசியலில் பரபரப்பு..!!!