நேரடியாக இடைத்தேர்தல் களத்தில் குதித்த ஸ்டாலின்...! அண்ணா அறிவாலயத்தில் அவசர ஆலோசனை கூட்டம்... தவெக-வை வீழ்த்த வெறி ஆட்டம் ஆடப்போகும் திமுக..!!!
மதுராந்தகம், தாராபுரம் இடைத்தேர்தல் களப்பணிகள் குறித்து திமுக தலைவர் மு.க.ஸ்டாலின் ஆலோசனை நடத்தினார். அக்டோபர் 2, 3-ல் பிரச்சாரம் செய்ய திட்டமிட்டுள்ளார்.
by
அதிமுகவில் இருந்து விலகி தமிழக வெற்றிக் கழகத்தில் இணைந்த 7 எம்.எல்.ஏக்களின் ராஜினாமாவால் காலியான தொகுதிகளில் முதற்கட்டமாக மதுராந்தகம், தாராபுரம் தொகுதிகளுக்கு இடைத்தேர்தல் அறிவிக்கப்பட்டுள்ளது. அக்டோபர் 6-ம் தேதி வாக்குப்பதிவு நடைபெற உள்ள நிலையில், அரசியல் கட்சிகள் தேர்தல் பணிகளை தீவிரப்படுத்தியுள்ளன.
இடைத்தேர்தல் களத்தில் மும்முனைப் போட்டி
2026 சட்டமன்றத் தேர்தலில் அதிமுக சார்பில் வெற்றி பெற்ற 47 எம்.எல்.ஏக்களில் 7 பேர் தங்கள் பதவிகளை ராஜினாமா செய்து தவெகவில் இணைந்தனர். இதையடுத்து காலியான தொகுதிகளுக்கு இடைத்தேர்தல் நடத்தும் சூழல் உருவானது. அதில் மதுராந்தகம் மற்றும் தாராபுரம் தொகுதிகளுக்கான தேர்தல் அக்டோபர் 6-ம் தேதி நடைபெறுகிறது.
இதையும் படிங்க: அறிவாலயத்தில் திடீர் அவசர கூட்டம்...! துரைமுருகன், கனிமொழியுடன் ஸ்டாலின் நடத்திய ரகசிய ஆலோசனை...!!!
இந்த தேர்தல் தவெகவுக்கு புதிய அரசியல் பலத்தை வெளிப்படுத்தும் வாய்ப்பாக பார்க்கப்படுகிறது. மறுபுறம், சட்டமன்றத் தேர்தலுக்குப் பிறகு தங்களது அரசியல் நிலையை வலுப்படுத்துவதில் திமுக கவனம் செலுத்தி வருகிறது. ஏற்கனவே தங்கள் வசம் இருந்த தொகுதிகளை மீண்டும் கைப்பற்றும் நோக்கில் அதிமுகவும் களப்பணிகளை முடுக்கிவிட்டுள்ளது.
அண்ணா அறிவாலயத்தில் ஸ்டாலின் ஆலோசனை
இந்நிலையில், சென்னை அண்ணா அறிவாலயத்தில் திமுக தலைவர் மு.க.ஸ்டாலின் இன்று கட்சியின் மூத்த தலைவர்களான துரைமுருகன் மற்றும் டி.ஆர்.பாலுவுடன் ஆலோசனை நடத்தினார். மதுராந்தகம், தாராபுரம் தொகுதிகளில் மேற்கொள்ள வேண்டிய தேர்தல் பணிகள், பிரச்சார ஏற்பாடுகள் உள்ளிட்டவை குறித்து ஆலோசிக்கப்பட்டதாகத் தெரிகிறது.
அக்டோபர் 2, 3-ல் நேரடி பிரச்சாரம்
தேர்தல் களத்தை தீவிரப்படுத்தும் வகையில் மு.க.ஸ்டாலின் நேரடியாக பிரச்சாரத்தில் ஈடுபட உள்ளார். அதன்படி, அக்டோபர் 2-ம் தேதி தாராபுரத்திலும், அக்டோபர் 3-ம் தேதி மதுராந்தகத்திலும் அவர் பிரச்சாரம் செய்ய திட்டமிட்டுள்ளார். இதையடுத்து இரு தொகுதிகளிலும் திமுகவின் தேர்தல் பணிகள் மேலும் தீவிரமடையும் என எதிர்பார்க்கப்படுகிறது.
