உன்னால முடிஞ்சத பாத்துக்கோ! சி.வி.சண்முகத்தை கட்சியில் இருந்து நீக்காமல் இருக்கும் எடப்பாடி...! பின்னணியில் உள்ள சட்ட கணக்கு.... தொடர்ந்து சவால் விடும் சண்முகம்...!!!!

தமிழக சட்டசபைத் தேர்தலில் எதிர்பாராத அரசியல் திருப்பமாக நடிகர் விஜய் தலைமையிலான தமிழக வெற்றிக் கழகம் 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ளது. அறுதிப் பெரும்பான்மைக்கு தேவையான எண்ணிக்கை இல்லாத நிலையில், தவெக ஆட்சியமைக்க முயன்றபோது அதிமுகவில் ஏற்பட்ட பிளவு புதிய அரசியல் கணக்கை உருவாக்கியுள்ளது. எஸ்.பி.வேலுமணி, சி.வி.சண்முகம் தலைமையிலான எம்.எல்.ஏ.க்கள் தவெக அரசுக்கு ஆதரவு தெரிவித்ததாக கூறப்படும் நிலையில், எடப்பாடி பழனிசாமியின் அடுத்தகட்ட நடவடிக்கை மீது கவனம் திரும்பியுள்ளது.

தவெக அரசுக்கு அதிமுக எம்.எல்.ஏ.க்கள் ஆதரவு

சட்டசபையில் தனிப்பெரும் கட்சியாக தவெக உருவெடுத்தாலும், ஆட்சி அமைக்க தேவையான பெரும்பான்மை பலம் இல்லாத சூழல் ஏற்பட்டது. இதைத் தொடர்ந்து அதிமுகவைச் சேர்ந்த சில எம்.எல்.ஏ.க்கள் விஜய் தலைமையிலான அரசுக்கு ஆதரவளிக்க முன்வந்தனர். குறிப்பாக எஸ்.பி.வேலுமணி மற்றும் சி.வி.சண்முகம் தரப்பினர் எடுத்த அரசியல் நிலைப்பாடு, அதிமுக தலைமையை நேரடியாக எதிர்கொள்ளும் சூழலை உருவாக்கியது.

இதையும் படிங்க: எடப்பாடியை எதிர்த்து நிற்கும் 2 புள்ளிகள்! விஜய்யின் தவெக அரசுக்கு ஆதரவு.... அதிமுகவை அதிரவைக்கும் அரசியல் நகர்வு!!!

இதனால் எடப்பாடி பழனிசாமிக்கு எதிராக அதிமுக சட்டமன்ற உறுப்பினர்கள் இரு அணிகளாகப் பிரியும் நிலை ஏற்பட்டது. இதையடுத்து போட்டி அணியாகச் செயல்பட்ட முக்கிய நிர்வாகிகள் மீது கட்சிப் பதவி பறிப்பு உள்ளிட்ட நடவடிக்கைகளை இபிஎஸ் மேற்கொண்டார்.

இபிஎஸ்க்கு தொடர்ந்து சவால் விடுக்கும் சி.வி.சண்முகம்

பதவி பறிக்கப்பட்ட பின்னரும் சி.வி.சண்முகம் தனது நிலைப்பாட்டை மாற்றவில்லை. மாறாக, எடப்பாடி பழனிசாமியின் தலைமை குறித்து தொடர்ந்து கடுமையான விமர்சனங்களை முன்வைத்து வருகிறார். தலைமைச் செயலகத்தில் செய்தியாளர்களிடம் பேசிய அவர், கட்சி தேர்தலில் தோல்வியடைந்தால் நிர்வாகிகளைப் பழிப்பதும், வெற்றி பெற்றால் அதற்கு தானே காரணம் எனக் கூறுவதும் சரியா என்று கேள்வி எழுப்பியிருந்தார்.

மேலும், தைரியம் இருந்தால் பொதுக்குழுவைக் கூட்டி தனது ஆதரவை நிரூபிக்க வேண்டும் என்றும் இபிஎஸ்க்கு சி.வி.சண்முகம் சவால் விடுத்து வருகிறார். இதற்கிடையே, கட்சியின் பொதுச்செயலாளரையே வெளிப்படையாக விமர்சித்து வரும் அவரை ஏன் இன்னும் கட்சியிலிருந்து முழுமையாக நீக்கவில்லை என்ற கேள்வியும் அதிமுக வட்டாரத்தில் எழுந்துள்ளது.

சி.வி.சண்முகத்தை நீக்காததற்கு சட்டக் கணக்கா?

சி.வி.சண்முகத்தை உடனடியாக கட்சியிலிருந்து நீக்க வேண்டும் என்று இபிஎஸ் ஆதரவாளர்கள் வலியுறுத்தி வருகின்றனர். ஆனால், இந்த விவகாரத்தில் எடப்பாடி பழனிசாமி அவசர முடிவு எடுக்காமல் நிதானமாகச் செயல்படுவதாக கூறப்படுகிறது.

இதன் பின்னணியில் முக்கியமான சட்டக் கணக்கு இருப்பதாக அரசியல் வட்டாரங்கள் தெரிவிக்கின்றன. சி.வி.சண்முகம் கட்சியிலிருந்து நீக்கப்பட்டுவிட்டால், அவர் கட்சியால் நீக்கப்பட்ட எம்.எல்.ஏ. என்ற நிலைக்கு செல்லக்கூடும். அப்படியான சூழலில், கட்சித் தாவல் தடைச் சட்டத்தின் கீழ் நடவடிக்கை எடுப்பதில் சிக்கல் ஏற்படலாம் என்ற கணக்கு முன்வைக்கப்படுகிறது.

இதனால், அவர் தனது எம்.எல்.ஏ. பதவியை தக்கவைத்துக்கொண்டு தவெக அரசுக்கு ஆதரவளிக்கவும், எதிர்காலத்தில் அமைச்சர் பதவி உள்ளிட்ட அரசியல் வாய்ப்புகளை பெறவும் வழி ஏற்படலாம் என இபிஎஸ் தரப்பு கருதுவதாக கூறப்படுகிறது. எதிரணிக்கு அத்தகைய வாய்ப்பை ஏற்படுத்திக் கொடுக்கக் கூடாது என்பதால், சி.வி.சண்முகம் விவகாரம் குறித்து எடப்பாடி பழனிசாமி மிகவும் கவனமாக ஆலோசித்து வருவதாக தகவல்கள் தெரிவிக்கின்றன.

ஒருபுறம் கட்சியின் தலைமைக்கு எதிரான வெளிப்படையான விமர்சனங்கள் அதிகரித்து வரும் நிலையில், மறுபுறம் எம்.எல்.ஏ.க்களின் அரசியல் நிலைப்பாடு தொடர்பான சட்டப்பூர்வ சிக்கலும் எழுந்துள்ளது. எனவே, எடப்பாடி பழனிசாமியின் அடுத்தகட்ட நடவடிக்கை அதிமுகவின் உள்கட்சி அரசியலிலும், சட்டசபை பலத்திலும் முக்கிய தாக்கத்தை ஏற்படுத்தும் என எதிர்பார்க்கப்படுகிறது.

இதையும் படிங்க: திடீர் பல்டி! ஒரே நாளில் மாறிய அரசியல் கணக்கு.... சற்றுமுன் கூண்டோடு அதிமுகவில் ஐக்கியம்.! மகிழ்ச்சியில் துள்ளும் எடப்பாடி!!!