மகளிர் விடுதியில் 10 இளம்பெண்கள் செய்த அதிர்ச்சி செயல்! சோதனையில் சிக்கிய மாத்திரைகள், சிரிஞ்சுகள்! பகீர் சம்பவம்...!!!
ஹைதராபாத் பெகம்பேட் மகளிர் விடுதியில் கருமுட்டைகள் சேகரிக்கப்பட்டதாக எழுந்த சந்தேகத்தைத் தொடர்ந்து போலீஸார் சோதனை நடத்தினர். மருத்துவப் பொருட்கள் சிக்கிய நிலையில் விசாரணை தீவிரமடைந்துள்ளது.
by
தெலங்கானா மாநிலம் ஹைதராபாத்தின் பெகம்பேட் பகுதியில் உள்ள மகளிர் விடுதியில், இளம்பெண்களிடம் இருந்து கருமுட்டைகளைச் சேகரித்து கருவுறுதல் சிகிச்சை மையங்களுக்கு அனுப்பியதாகச் சந்தேகம் எழுந்துள்ளது. இதையடுத்து போலீஸார் அந்த விடுதியில் அதிரடிச் சோதனை நடத்தினர். அங்கு தங்கியிருந்த 10 இளம்பெண்களிடம் விசாரணை மேற்கொள்ளப்பட்டு வருகிறது. எனினும், சட்டவிரோதமாக கருமுட்டைகள் சேகரிக்கப்பட்டது இதுவரை உறுதி செய்யப்படவில்லை.
விடுதியில் சிரிஞ்சுகள், கருத்தடை மாத்திரைகள் பறிமுதல்
பெகம்பேட் போலீஸாரும் மல்காஜ்கிரி சிறப்புப் படையினரும் இணைந்து இந்தச் சோதனையை நடத்தினர். அப்போது பீகார், உத்தரப் பிரதேசம், ஒடிசா உள்ளிட்ட மாநிலங்களைச் சேர்ந்த சுமார் 10 இளம்பெண்கள் விடுதியில் தங்கியிருந்தது தெரியவந்தது. அவர்களிடம் விசாரணை நடத்திய போலீஸார், அறைகளிலும் சோதனை மேற்கொண்டனர்.
இதையும் படிங்க: மொத்த குடும்பமும் போச்சு... ஒரே குடும்பத்தைச் சேர்ந்த மூவர் உயிரிழப்பு! அதிரவைக்கும் காரணம்... நெஞ்சை பதறவைக்கும் சோகம்..!!!
அப்போது சிரிஞ்சுகள், கருத்தடை மாத்திரைகள் உள்ளிட்ட மருத்துவப் பொருட்கள் அங்கிருந்து கண்டெடுக்கப்பட்டுள்ளது. அவற்றை போலீஸார் பறிமுதல் செய்து, மருத்துவப் பரிசோதனைக்காக காந்தி அரசு மருத்துவமனைக்கு அனுப்பி வைத்துள்ளனர். இதையடுத்து, அந்த விடுதியில் கருமுட்டை சேகரிப்பு நடந்திருக்கலாம் என்ற சந்தேகம் வலுத்துள்ளது.
ஓராண்டாகச் செயல்பட்டதா? பல கோணங்களில் விசாரணை
வெவ்வேறு மாநிலங்களில் இருந்து இளம்பெண்களை அழைத்து வந்து விடுதியில் தங்கவைத்து, அவர்களிடம் இருந்து கருமுட்டைகளைச் சேகரித்து IVF சிகிச்சை மையங்களுக்கு அனுப்பியிருக்கலாம் என போலீஸார் சந்தேகிக்கின்றனர். ஆண்களிடம் இருந்து விந்தணு மாதிரிகளும் சேகரிக்கப்பட்டனவா என்ற கோணத்திலும் விசாரணை நடைபெற்று வருகிறது. இந்த நடவடிக்கை சுமார் ஓராண்டாக நடந்திருக்கலாம் என்றும் போலீஸார் கருதுகின்றனர்.
விடுதியை நடத்துபவர்கள், இடைத்தரகர்கள் மற்றும் கருவுறுதல் சிகிச்சை மையங்களுக்கு இடையே தொடர்பு உள்ளதா என்பதையும் அதிகாரிகள் ஆய்வு செய்து வருகின்றனர். பெண்கள் தங்களது விருப்பத்துடன் அங்கு வந்தார்களா, அவர்களுக்கு எதற்காக அழைப்பு விடுக்கப்பட்டது, மருத்துவச் செயல்முறை குறித்து முன்கூட்டியே விளக்கப்பட்டதா என்பன உள்ளிட்ட கேள்விகளுக்கும் பதில் தேடப்பட்டு வருகிறது.
கருமுட்டை சேகரிப்பு நடந்ததா? போலீஸ் விளக்கம்
இதற்கிடையே, விடுதியில் கருமுட்டை சேகரிப்பு நடைபெற்றது என்பதற்கான உறுதியான ஆதாரம் இதுவரை கிடைக்கவில்லை. IVF சிகிச்சைக்கான ஸ்கேனிங் நடந்ததற்கான சான்றுகளும் கண்டறியப்படவில்லை என பெகம்பேட் காவல் நிலைய ஆய்வாளர் பி. சைதுலு தெரிவித்துள்ளார்.
இந்த விவகாரம் தொடர்பாக வழக்குப் பதிவு செய்யப்பட்டுள்ள நிலையில், பறிமுதல் செய்யப்பட்ட பொருட்களின் மருத்துவ ஆய்வு அறிக்கைக்காக போலீஸார் காத்திருக்கின்றனர். அந்த அறிக்கை கிடைத்த பிறகே விடுதியில் நடந்ததாகக் கூறப்படும் செயல்பாடுகளின் உண்மை நிலை தெரியவரும்.
