ஒரு ரீல்ஸ் வீடியோவுக்காகவா இப்படி? சொந்த மகளையே கொடூரமாக தாக்கி நாடகமாடிய தந்தை! இறுதியில் அம்பலமான அதிர்ச்சி உண்மை...!!!
குஜராத்தில் ஆண் நண்பருடன் எடுத்த ரீல்ஸ் வைரலான நிலையில், 22 வயது இளம்பெண் கொலை செய்யப்பட்டதாக விசாரணையில் தெரியவந்துள்ளது. தந்தையும் அண்ணனும் கைது.
by
குஜராத்தில் சமூக வலைதளங்களில் வைரலான ரீல்ஸ் வீடியோ, 22 வயது இளம்பெண்ணின் கொலைக்கு காரணமாகியிருப்பது அதிர்ச்சியை ஏற்படுத்தியுள்ளது. அகமதாபாத் சர்கேஜ் பகுதியைச் சேர்ந்த சோபியா பரூக், தனியார் மருத்துவமனையில் ரிசப்ஷனிஸ்ட்டாக வேலை செய்து வந்தார். ஆண் நண்பருடன் அவர் எடுத்த வீடியோவைத் தொடர்ந்து குடும்பத்தினர் கட்டுப்பாடுகள் விதித்த நிலையில், தற்போது அது சோபியா பரூக் கொலை வழக்காக மாறியுள்ளது.
வைரலான ரீல்ஸ்... குடும்பத்தில் தொடங்கிய பிரச்சினை
சுமார் மூன்று மாதங்களுக்கு முன்பு சோபியா தனது ஆண் நண்பருடன் சேர்ந்து எடுத்த ரீல்ஸ் வீடியோ சமூக வலைதளங்களில் வைரலானது. இதனால் ஆத்திரமடைந்த அவரது தந்தை மொகமத் பரூக்கும், அண்ணன் ஹபில் பரூக்கும், அந்த இளைஞருடன் இனி பேசக்கூடாது என்றும், இதுபோன்ற வீடியோக்களை வெளியிடக்கூடாது என்றும் சோபியாவிடம் கூறியதாக தெரிகிறது.
ஆனால், குடும்பத்தினரின் கட்டுப்பாட்டை மீறி சோபியா மீண்டும் அந்த இளைஞருடன் பழகக்கூடும் என இருவரும் சந்தேகித்துள்ளனர். இதனால் குடும்பக் கௌரவம் பாதிக்கப்படும் என்று கருதிய அவர்கள், சோபியாவை கொலை செய்ய திட்டமிட்டதாக காவல்துறை விசாரணையில் தெரியவந்துள்ளது.
இரும்புச் சுத்தியலால் தாக்கிவிட்டு சாலையில் விட்டுச் சென்றனர்
இதையடுத்து, சோபியாவை தனியாக கெல்ஜிபுரா பகுதிக்கு ஹபில் அழைத்துச் சென்றதாக கூறப்படுகிறது. ஆள் நடமாட்டம் இல்லாத நேரத்தில் மறைத்து வைத்திருந்த இரும்புச் சுத்தியலால் அவரது தலையின் பின்புறத்தில் பலமாக தாக்கியுள்ளார். படுகாயமடைந்து மயங்கி விழுந்த சோபியாவை அங்கேயே விட்டுவிட்டு இருவரும் சென்றதாக போலீசார் தெரிவித்துள்ளனர்.
பின்னர், சோபியா இருசக்கர வாகனத்தில் சென்றபோது அடையாளம் தெரியாத வாகனம் மோதி விபத்து ஏற்பட்டதாக தந்தையும் மகனும் கூறியதாக தெரிகிறது. தகவலறிந்து சென்ற போலீசார் சோபியாவை மீட்டு மருத்துவமனைக்கு அனுப்பினர். ஆனால், சிகிச்சை பலனின்றி அவர் உயிரிழந்தார். தொடக்கத்தில் இது Gujarat Crime வழக்கில் சாலை விபத்தாகவே பதிவு செய்யப்பட்டு விசாரணை நடந்தது.
முரண்பட்ட தகவல்களால் வெளிச்சத்துக்கு வந்த கொலை
சோபியா சென்ற பாதை மற்றும் நடந்ததாக கூறப்பட்ட விபத்து குறித்து குடும்பத்தினரிடம் போலீசார் விசாரித்தனர். அப்போது தந்தையும் அண்ணனும் அளித்த பதில்களில் முரண்பாடுகள் இருந்ததாக கூறப்படுகிறது. இதனால் சந்தேகமடைந்த போலீசார் விசாரணையை தீவிரப்படுத்தினர்.
தொடர்ந்து நடத்தப்பட்ட விசாரணையில், சாலை விபத்து என கூறப்பட்டது நாடகம் என்பதும், குடும்பக் கௌரவம் தொடர்பான காரணத்தால் சோபியா திட்டமிட்டு கொலை செய்யப்பட்டதும் தெரியவந்ததாக போலீசார் தெரிவித்தனர். இதையடுத்து மொகமத் பரூக் மற்றும் ஹபில் பரூக் ஆகிய இருவரையும் கைது செய்த போலீசார், அவர்களை நீதிமன்றத்தில் ஆஜர்படுத்தி சிறையில் அடைத்தனர்.
